आरग-लक्ष्मीवाडी रस्त्यावर अपघात
प्रतिनिधी / मिरज
तालुक्यातील आरग-लक्ष्मीवाडी रस्त्यावर ट्रॅक्टर आणि दुचाकीचा अपघात होऊन अरविंद पाटील (वय ४५ रा. बेडग) हे जागीच ठार झाले. सोमवारी रात्री उशिरा हा अपघात झाला. या अपघात दोन महिलाही जखमी झाल्या आहेत. त्यांना उपचारासाठी रुग्णालयात दाखल करण्यात आले आहे. या अपघाताबाबत मिरज ग्रामीण पोलिसात नोंद झाली आहे.
याबाबत अधिक माहिती अशी, अरविंद पाटील हे सोमवारी रात्री पार्वती साळुंखे (वय ३५) आणि वैशाली कदम (वय ४०) यांना दुचाकीवर मागे बसवून लक्ष्मीवाडीकडे चालले होते. समोरून भरधाव वेगाने एक ट्रॅक्टर येत होती. रस्ता अरुंद असल्याने शिवाय ते ट्रिपलसीट असल्याने पाटील यांना मोटारसायकल रस्त्याच्या कडेला नेता आली नाही. त्यामुळे ट्रॅक्टरची समोरून जोरात धडक बसली. अरविंद पाटील हे ट्रॅक्टरखाली जाऊन त्यांच्या डोक्यावरून ट्रॅक्टरचे चाक गेल्याने ते जागीच ठार झाले. तर दोन महिला जखमी झाल्या.
