वार्ताहर / शेडगेवाडी
शिराळा तालुक्यातील कोकरूड चेकपोस्टवर नेमणुकीस असणाऱ्या पोलिसांना, येथील महिलांनी राख्या बांधून रक्षाबंधन साजरे केले. जिल्हाबंदीसाठी रात्र दिवस हद्दीची राखण केल्याबद्दल आभार मानले.
मार्च महिन्यापासून जिल्हाबंदी करण्यात आलेली आहे, तेव्हापासून सांगली व कोल्हापूर जिल्हा यांच्यामध्ये कोकरूड पुलाजवळ असणाऱ्या चेकपोस्टवर असणाऱ्या पोलीस कर्मचारी त्याचबरोबर इतर कर्मचारी दिवस – रात्र ड्यूटी करत आहेत. आज रक्षाबंधन असले तरीही त्यांना ड्युटीमुळे घरी जाता आले नाही. हीच उणीव कोकरूड येथील महिलांनी लक्षात घेऊन, या पोस्टवर कार्यरत असणाऱ्या पोलिसांना राख्या बांधून भरून काढली.
कोरोना विषाणूचा संसर्ग थांबवण्यासाठी करण्यात आलेली जिल्हाबंदी त्यामुळे दोन्ही जिल्ह्यातील विनाकारण फिरणाऱ्या लोकांना पायबंद बसला आहे. हे केवळ जिल्हाबंदी मुळेच शक्य झाले आहे. म्हणून या ठिकाणी आलेल्या महिलांनी चेक पोस्टवर कार्यरत असणाऱ्या पोलिस व कर्मचाऱ्यांचे आभार मानले. यावेळी पोलीस नाईक, विशाल भिसे ,पोलीस कॉन्स्टेबल – सावंत, आदी कर्मचारी उपस्थित होते.
