वार्ताहर / डफळापुर
जत तालुक्यातील कुडणूर येथे एकाच आठवड्यात आठ जणांचा मुत्यू झाला आहे. मात्र मृत्यूचे कारण गावात कोणालाही समजले नाही. त्यामुळे कोरोना संसर्गाच्या संशयाने गावात भीतीचे वातावरण पसरले आहे. मृत्यू झालेले काही ४५ वर्षे पुढील तर काही ६० वर्षे पुढील वयाचे असल्याचे नागरिकांनी सांगितले.
डफळापूर प्राथमिक आरोग्य केंद्राअतर्गंत कुडणूर उपकेंद्रातील डॉक्टर गावात काहीवेळा हजर नसल्याने सतीश चव्हाण, अमृत पाटील यांच्यासह नागरिकांनी जिल्हा परिषद सदस्य महादेव पाटील, पंचायत समिती सदस्य दिग्विजय चव्हाण यांच्याबरोबर मंगळवारी डफळापूर प्राथमिक आरोग्य केंद्रात ठिय्या मांडला.याबाबत केंद्राच्या अधिकाऱ्यांना जाब विचारला.
कुडनूर येथे आरोग्य कर्मचारी गैरहजर राहत असल्याने गावात आरोग्याची स्थिती बिघडल्याचा नागरिकांनी आरोप केला.वास्तविक एकाच आठवड्यात आठ नागरिकांचा झालेला मुत्यू नेमका कशामुळे झाला याचा शोध आरोग्य विभागाने घेण्याची मागणी नागरिकांनी केली आहे.त्याचबरोबर आणखी काही नागरिकांच्या आरोग्याची तपासणी होणे गरजेचे आहे. दरम्यान जि. प.सदस्य महादेव पाटील, पं. स.सदस्य दिग्विजय चव्हाण यांनी केंद्रातील वरिष्ठ अधिकाऱ्यांना खडे बोल सुनावत कुडनूर गावातील आरोग्य व्यवस्थेकडे तातडीने लक्ष देण्याची मागणी केली.
कुडणूर येथे मयत नागरिकांच्या नातेवाईकांची कोरोना तपासणी करण्यात येणार आहे. त्याशिवाय गावातील सर्व नागरिकांची तपासणीसाठी पथक नेमल्याचे डफळापुरचे वैद्यकीय अधिकारी डॉ.अभिजीत चोथे यांनी सांगितले.
