आष्टा / वार्ताहर
पेठ सांगली रस्त्यावर कारंदवाडी जवळ कारने मोटरसायकलला धडक देवून झालेल्या अपघातात शेतमजूर जागीच ठार झाला. मल्लाप्पा एकाप्पा बगले (वय४५) असे या अपघातात ठार झालेल्या शेतमजूराचे नाव असून या अपघाताची नोंद आष्टा पोलिस ठाण्यात झाली आहे.
याबाबत घटनास्थळावरून आणि आष्टा पोलीस ठाणे कडून मिळालेली अधिक माहिती अशी, गुरुवारी दुपारी यल्लाप्पा बगले हे हिरो होंडा स्प्लेंडर मोटर सायकल वरून जात असताना त्यांना इस्लामपूरच्या दिशेने जात असलेल्या कारने पाठीमागून धडक दिली. या धडकेनंतर यल्लाप्पा बगले हे रस्त्यावर पडले. यावेळी त्यांच्या डोक्याला गंभीर दुखापत झाल्याने ते जागीच ठार झाले.
बगले यांच्या पश्चात पत्नी, दोन मुले असा परिवार आहे. याबाबत आष्टा पोलिस ठाण्यात मयत बगले यांचा मुलगा प्रशांत बगले याने फिर्याद दिली आहे. पोलिसांनी कार चालक विजयकुमार खतवाणी यांच्या विरोधात फिर्याद दिली आहे. पोलिस निरीक्षक अजित सिद यांचे मार्गदर्शनाखाली आष्टा पोलिस अधिक तपास करीत आहेत.
