प्रतिनिधी / सांगली
इंधन दरवाढीच्या विरोधात शिवसेनेच्या वतीने केंद्र सरकारच्या निषेधार्थ सांगलीमध्ये सायकल मोर्चा काढण्यात आला. इंधन दरवाढीचा निषेध नोंदवत जिल्हाधिकारी कार्यालयावर हा सायकल मोर्चा शुक्रवारी काढण्यात आला.
केंद्र सरकारच्या वतीने पेट्रोल आणि डिझेल दरांमध्ये वाढ करण्यात आलेली आहे. यामुळे देशभर संतप्त प्रतिक्रिया व्यक्त होत आहेत. सर्वसामान्य वर्गासाठी ही दरवाढ अन्यायकारक असल्याने शिवसेनेच्यावतीने शुक्रवारी सांगली जिल्हाधिकारी कार्यालयावर सायकल मोर्चा काढण्यात आला. केंद्र सरकारचा निषेध म्हणून सायकल-रीक्षावर दुचाकी ठेवून जिल्हाधिकारी कार्यालयावर शिवसेनेच्यावतीने हा मोर्चा काढण्यात आला. शहरातील स्टेशन चौक येथून विजयनगर येथील जिल्हाधिकारी कार्यालयापर्यंत हा मोर्चा निघाला. यावेळी अनेक शिवसैनिकांनी सायकल घेऊन या मोर्चामध्ये सहभाग नोंदवला होता.
या सायकल मोर्चामध्ये मोजक्याच शिवसैनिकांनी सायकल घेऊन सहभाग नोंदवला. त्यापेक्षा दुचाकीवरून सहभागी झालेल्या कार्यकर्ते आणि नेत्यांची संख्या अधिक पाहायला मिळाली. त्यामुळे हा मोर्चा सायकलचा होता की दुचाकींचा होता ? असा प्रश्न निर्माण झाला होता.
