सर्वपक्षीय पदाधिकाऱ्यांच्या बैठकीत निर्णय : काँग्रेस, भाजपच्या विरोधाला यश : राष्ट्रवादीला दणका
प्रतिनिधी / सांगली
उपसूचनेद्वारे आरसीएचकडील कर्मचाऱ्यांना मानधन वाढ देण्याचा ठराव अखेर बारगळला आहे. काँग्रेससह भाजपच्या सदस्यांनी विरोध दर्शवला होता. याबाबत आयुक्त नितीन कापडणीस यांच्या दालनामध्ये भाजप, राष्ट्रवादी व काँग्रेस पदाधिकाऱ्यांची बैठक झाली. सर्वानुमते हा ठराव रद्द करण्याचा निर्णय घेण्यात आला. यामुळे काँग्रेस, भाजपच्या विरोधाला यश आल आहे. तर राष्ट्रवादीला मात्र दणका बसला आहे.
महापालिकेची महासभा 20 एप्रिल रोजी ऑनलाईन पार पडली होती. सभेसमोर आशा वर्कर्स व गटप्रवर्तकांना प्रोत्साहनपर मानधन म्हणून पाच हजार रुपये देण्याचा विषय होता. याचा ठराव करण्यात आला. मात्र उपसूचनेद्वारे यामध्ये आरसीएचकडील अधिकारी, कर्मचाऱ्यांना मानधन वाढीचा विषय घुसडण्यात आला. तसा ठरावही करण्यात आला. या ठरावाला काँग्रेस नगरसेवक फिरोज पठाण, आरती वळवडे यांनी विरोध दर्शवला होता. हा ठराव रद्द करण्याची मागणी महापौरांकडे केली होती.
मात्र हा ठराव कायम करण्यात आला होता. त्यानंतर काँग्रेसमध्ये नाराजीचा सूर उमटला. उपमहापौर उमेश पाटील, विरोधी पक्षनेते उत्तम साखळकर, नगरसेवक अभिजीत भोसले यांनी आयुक्तांची भेट घेत ठरावाची अमंलबजावणी करु नये अशी मागणी केली होती. भाजपचे गटनेते विनायक सिंहासने, स्थायी सभापती पाडूरंग कोरे यांनीही याबाबत आयुक्तांना पत्र दिले होते. विरोध वाढत चालल्याने आयुक्त कापडणीस यांनी या संदर्भात सोमवारी सर्व पक्षीय बैठक घेतली.
उपमहापौर उमेश पाटील, विरोधी पक्षनेते उत्तम साखळकर, विनायक सिंहासने, पाडूरंग कोरे, राष्ट्रवादेचे गटनेते मैनुद्दीन बागवान, नगरसेवक संतोष पाटील, फिरोज पठाण, विष्णू माने, अभिजीत भोसले, अमर निंबाळकर उपस्थित होते. आरसीएचकडील कर्मचाऱ्यांची कंत्राटी पद्धतीने नियुक्ती आहे. त्यांची मुदत, त्यांना देण्यात येणाऱ्या मानधनाविषयी शासन निर्णय, इतर `ड’ वर्ग महानगरपालिकांनी आरसीएच अंतर्गत भरती केलेल्या कर्मचाऱ्यांच्याबाबतची धोरणे याबाबत सविस्तर अहवाल महासभेसमोर न आणता हा ठराव करण्यात आला आहे. भविष्यात लेखापरिक्षणामध्ये वसूलीही लागू शकते. त्यामुळे ठराव रद्द करावा अशी मागणी काँग्रेस, भाजपच्या पदाधिकाऱ्यांनी बैठकित केली.
कर्मचाऱ्यांना मानधन वाढ द्यायचीच असेल तर ती किती व कशा पद्धतीने देता येईल याबबतचा सविस्तर अहवाल प्रशासनाने पुढील महासभेत सादर करावा असेही सूचविण्यात आले. राष्ट्रवादीचे गटनेते मैनुद्दीन बागवान, विष्णू माने यांनीही काँग्रेस, भाजपा पदाधिकाऱ्यांच्या भूमिकेला सहमती दर्शवली. अखेर हा ठराव रद्द करण्याचा निर्णय सर्वानुमते घेण्यात आला. यामुळे राष्ट्रवादीला मात्र दणका बसला आहे.
कायम झालेला ठराव रद्द होणार
आरसीएचकडील कर्मचाऱ्यांना मानधन वाढ देण्याचा ठराव कायम करण्यात आला होता. आयुक्तांनी या ठरावाची अमंलबजावणी करु नये, अशी मागणी करण्यात आली होती. त्या संदर्भात सर्व पक्षीय पदाधिकाऱ्यांची बैठक पार पडली. या बैठकीत यावर सखोल चर्चा करण्यात आली. सर्वानुमते हा ठराव रद्द करण्याचा निर्णय घेण्यात आला.
उत्तम साखळकर, विरोधी पक्षनेते, मनपा.
