व्यवसायिकांचे जिल्हाधिकारी कार्यालयासमोर लाक्षणिक उपोषण
प्रतिनिधी/रत्नागिरी
सलून व ब्युटी पार्लर चालू करण्यासंदर्भात नाभिक समाज अध्यक्ष रत्नागिरी श्रीकृष्ण उर्फ बावा चव्हाण यांनी प्रशासनाकडे वेळोवेळी निवेदनाद्वारे मागणी करूनही कोणतीच दाद घेतली गेली नाही. त्यामुळे हताश झालेल्या या व्यवसायिकांनी बुधवारी रत्नागिरी जिल्हाधिकारी कार्यालयासमोर लाक्षणिक उपोषण केले. आमदार राजन साळवी यांनी या उपोषणकर्त्यांची व्यथा जाणून घेत हे व्यवसाय सुरू करण्याची परवानगी मिळण्याची ग्वाही दिली.
कोविड 19 च्या पार्श्वभूमीमुळे शासनाच्या निर्देशानुसार लॉकडाऊनमुळे संपूर्ण जिल्हा बंद स्थितीत होता. 1 जूननंतर जनजीवन व व्यवसाय हळूहळू पूर्व पदावर येत असताना जिह्यामध्ये सलून व ब्युटी पार्लर सुरू करण्याबाबतचा निर्णय प्रशासनाकडून घेण्यात आलेला नाही. त्यामुळे हातावर पोट असलेल्या नाभिक समाजाचे अतोनात हाल होत आहेत. खबरदारी घेऊन सलून व ब्युटी पार्लर चालू करण्यासंदर्भात प्रशासनाकडे वेळोवेळी मागणी केली. प्रशासनस्तरावर त्याची कोणतीच दाद न घेतली गेल्यामुळे रत्नागिरी जिल्हाधिकारी कार्यालयासमोर लाक्षणिक उपोषण करण्यात आले.
त्याप्रसंगी राजापूर-लांजा-साखरपा विधानसभा मतदारसंघाचे आमदार राजन साळवी ह्यांनी उपोषणकर्त्याची भेट घेतली. नाभिक समाजाची बाजू प्रशासनाकडे मांडून लवकरात लवकर सलून व ब्युटी पार्लर चालू होण्यासंदर्भात प्रयत्न करण्याची ग्वाही दिली. त्यावेळी रत्नागिरी तालुका अध्यक्ष श्रीकृष्णा चव्हाण, हेअर अँड ब्युटी असोशियनच्या अध्यक्षा प्रगती वाझे, अपूर्वा गणफुले, मेधा कुळकर्णी, श्वेता पवार, बाळकृष्ण चव्हाण, विकास चव्हाण, महादेव चव्हाण, दिनेश चव्हाण, नितीन चव्हाण, अनिल चव्हाण, अनिकेत चव्हाण, मंदार चव्हाण, राजू शिंदे, प्रकाशा हातखंबकर, बबलू चव्हाण किशोर चव्हाण, प्रशांत भोजने, संतोष यादव, राजन दळवी व मान्यवर उपस्थित होते.
