बेंगळूर/प्रतिनिधी
कर्नाटकात कोरोनाचा वेग वाढत चालला आहे. राज्यात दररोज वाढणाऱ्या कोरोनाच्या संख्येमुळे प्रशासन चिंतेत आहे. राज्यात कोरोनाची दुसरी लाट सुरु झाली आहे. दरम्यान कोरोनाच्या दुसऱ्या लाटेवर मात करण्यासाठी सरकारने योजना आखली आहे. राज्यात सलग दुसऱ्या दिवशी कोरोनाची संख्या वाढली आहे. राज्यात गुरुवारी कोरोना रुग्णांची संख्या २,५०० च्या वर गेली होती. शुक्रवारी पुन्हा कोरोनाने २,५०० चा टप्पा ओलांडला आहे. शुक्रवारी राज्यात कोरोनाचा वेग वाढल्याने त २,५६६ रुग्णांची भर पडली. राज्यात सध्या सक्रिय रुग्णांची संख्या १९,५५३ वर पोहोचली आहे.
आरोग्य विभागाने जारी केलेल्या बुलेटिननुसार राज्यात गुरुवारी २,५६६ जणांना कोरोनाची लागण झाल्याचे म्हंटले आहे. तर, राज्यातील विविध जिल्ह्यातून १,२०७ रुग्ण बरे झाल्यानंतर घरी परतले आहेत. शुक्रवारी कोरोनामुळे १३ जणांचा मृत्यू झाला आहे. वाढती कोरोना रुग्णांची संख्या राज्याची चिंता वाढवणारी आहे. वाढती रुग्णसंख्या लक्षात घेऊन आरोग्य मंत्र्यांनी लॉकडाऊनचे संकेत दिले आहेत.
दरम्यान राज्यात कोरोना रुग्णांची एकूण संख्या ९,८१,०४४ वर पोहोचली आहे. तर यापैकी ९,४८,९८८ रुग्ण कोरोनावर मात करत रुग्णालयातून घरी परतले आहेत. तसेच कोरोनामुळे राज्यात आतापर्यंत १२४८४ रुग्णांचा मृत्यू झाला आहे.
दरम्यान राज्यात बेंगळूर शहरी जिल्ह्यात कोरोना रुग्णांची संख्या झपाटयाने वाढत आहे. बेंगळूरमध्ये प्रशासन कोरोनावर नियंत्रण नजर ठेऊन आहे. जिल्ह्यात प्रशासनाने अनेक कार्यक्रमांवर बंदी घातली आहे. तसेच कोरोना नियमांचे उल्लंघन केल्यास दंडाची रक्कमही वाढवली आहे. दरम्यान शुक्रवारी जिल्ह्यात १,४९० नवीन पॉझिटिव्ह रुग्ण आढळले आहेत.दरम्यान जिल्ह्यात सध्या १३,३२७ रुग्णांवर उपचार सुरु आहेत. बेंगळूर शहरी जिल्ह्यात कोरोना संक्रमणामुळे आतापर्यंत ४,५७२ रुग्णांचा मृत्यू झाला आहे.
