मुंबई : मराठा आरक्षण आणि एसटी आंदोलनात आघाडी घेऊन वादग्रस्त ठरलेले गुणरत्न सदावर्ते हे आता निवडणुकीच्या रिंगणात उतरणार आहेत. वकील सदावर्ते हे लवकरच एका नवीन संघटनेची घोषणा करणार असून एक वादळी आणि वादग्रस्त संघटना म्हणून त्याकडे पाहिले जाण्याची शक्यता आहे. सदावर्ते हे एसटी महामंडळ बँकेच्या निवडणुकीत स्वतंत्र पॅनल तयार करून निवडणूक लढवणार असल्याची माहिती समोर येत आहे.
गेल्या सहा महिन्यांपासून एसटी कर्मचाऱ्यांच्या बाजूने उभे राहून राज्य सरकारवर निशाणा साधण्यात वकील गुणरत्न सदावर्ते चर्चेत राहिले. राज्य सरकारवर आगपाखड करत घणाघाती टीका केली. त्यामुळे राज्यभरात एसटी कर्मचाऱ्यांच्या आंदोलनामुळे वकील असलेले गुणरत्न सदावर्ते हे वादग्रस्त वकील बनले. त्यांनी रविवारी माध्यमांशी संवांद साधत सत्ताधाऱ्यांना लक्ष्य केलं. ‘कष्टकरी आता स्वत:च स्वत:ची माणसे निवडतील. आतापर्यंत राजकीय नेत्यांकडून शेतातील बुजगावण्यांसारखे लोक निवडणुकीत उभे केले जात होते. हे लोक कष्टकऱ्यांचं आर्थिक शोषण करत होते, मात्र आता ही स्थिती बदलणार आहे,’ असं सदावर्ते यांनी म्हटलं आहे. त्यामुळे ते लवकरच आपल्या संघटनेची घोषणा करून निवडणुकीच्या मैदानात एण्ट्री घेतील, असं सांगितलं जात आहे.
शरद पवार यांच्या निवासस्थानी झालेल्या हल्ल्याप्रकरणी अटकेत असलेल्या गुणरत्न सदावर्ते यांना नंतर इतर जुन्या गुन्ह्यांतही अटक करण्यात आली. त्यामुळे सदावर्ते हे तब्बल १८ दिवस तुरुंगात होते. अखेर कोर्टाने जामीन मंजूर केल्याने तुरुंगातून बाहेर पडलेल्या सदावर्ते यांनी आता निवडणुकीच्या आखाड्यात उतरण्याचा निर्णय घेतला असून त्यांची आगामी काळातील वाटचालही वादळी ठरण्याची शक्यता आहे.
