महावितरणचा दावा : 1 जूनपासून मीटर रिडींग झाले सुरू
2 लाख 65 हजार ग्राहकांनी स्वतःहून मीटर रिडींग पाठविले
वार्ताहर / कणकवली:
लॉकडाऊनच्या कालावधीत ग्राहकांनी केलेल्या वीज वापराचे प्रत्यक्ष रिडिंग घेतल्यानंतर संगणकीकृत बिलिंग प्रणालीद्वारे एप्रिल, मे महिन्यासह जूनच्या देण्यात आलेल्या तीन महिन्यांच्या स्लॅब बेनिफिटसह एकत्रित वीजबिल योग्य व अचूक असल्याचा दावा महावितरणमार्फत करण्यात आला आहे. या वीजबिलामध्ये कोणत्याही प्रकाराचा अतिरिक्त भुर्दंड लावण्यात आलेला नाही. त्यामुळे ग्राहकांनी वीजबिलांबाबत संभ्रम नको आणि कोरोनाच्या पार्श्वभूमीवर वीजबिल दुरुस्तीसाठी कार्यालयांत गर्दी करू नये, असे आवाहन महावितरणने केले आहे.
दोन ते तीन महिन्यांच्या एकत्रित वीजबिलाची माहिती घेण्यासाठी तसेच स्लॅब बेनिफिट, भरलेल्या रकमेचे समायोजन, मासिक वीजवापर व स्लॅबप्रमाणे लावलेला वीजदर आदींची पडताळणी करण्याची सुविधा देण्यात आलेली आहे. यासाठी महावितरणने वीज ग्राहकांसाठी billcal.mahadiscom.in ही लिंक उपलब्ध करून दिलेली आहे. केवळ ग्राहक क्रमांक देऊन या लिंकद्वारे वीज बिलाचा संपूर्ण डेटा व महावितरणकडून करण्यात आलेल्या ग्राहकांना वीजबिलांचे विश्लेषण पाहण्यासाठी उपलब्ध असल्याचे महावितरणकडून सांगण्यात आले.
एकूण 2 कोटी 30 लाख ग्राहक
कोरोनामुळे राज्यात 23 मार्चपासून लॉकडाऊन सुरू झाल्यामुळे महावितरणकडून मीटर रिडींग, वीजबिल वितरण व बिल भरणा केंद्र बंद करण्यात आले होते. रिडिंग बंद झाल्यामुळे राज्यातील लघुदाब ग्राहकांना सरासरी वीजबिल देण्यात आले. वेब पोर्टल व मोबाईल ऍपद्वारे मीटरचे रिडिंग पाठविण्याचे आवाहन करण्यात आले. यात 2 कोटी 30 लाख ग्राहकांपैकी केवळ 2 लाख 65 हजार वीज ग्राहकांनी स्वतःहून मीटर रिडींग पाठविले. त्याप्रमाणे त्यांना वीजवापराचे अचूक मासिक वीजबिल देण्यात येत असल्याची माहिती महावितरणकडून देण्यात आली.
एप्रिल ते जूनचे एकत्रित बिल पाठविणार
उर्वरित वीज ग्राहकांना पाठविण्यात आलेली सरासरी वीजबिले दुरुस्त करण्यासाठी रिडींग घेणे आवश्यक होते. लॉकडाऊन शिथील झाल्यानंतर 1 जूनपासून स्थानिक प्रशासनाने परवानगी दिलेल्या भागात मीटर रिडिंग, वीजबिल वितरण व बिल भरणा केंद्र सुरू करण्यात आले आहे. मीटर रिडिंग प्रत्यक्ष उपलब्ध झाल्यानंतर ग्राहकांना लॉकडाऊन कालावधीतील एप्रिल व मेसह जून महिन्याचे वीजबिल एकत्रित पाठविण्यात येत आहे. उदा. ग्राहकांना जूनमध्ये 3.07 महिन्यांचे 307 युनिटचे वीजबिल आले असेल, तर एप्रिल, मे व जूनमध्ये प्रत्येकी 100 युनिटचा वीज वापर झाला आहे. मात्र, जूनच्या बिलातील 307 युनिटला थेट 301 ते 500 युनिटचा स्लॅब दर न लावता, तीन महिन्यांच्या प्रत्येकी 100 युनिटला 0 ते 100 युनिटचा स्लॅब दर लावण्यात येत आहे. शिवाय 31 मार्चपर्यंत वापरलेल्या युनिटची संख्या दर्शवून 31 मार्च 2020 पूर्वी जे वीजदर लागू होऊन तेच दर लावण्यात आले आहेत. एवढी अचूकता महावितरणने संगणकीकृत प्रणालीमध्ये वापरल्याचा दावा करण्यात आला आहे.
उर्वरित रक्कम समायोजित करणार
वीज ग्राहकांनी लॉकडाऊनच्या कालावधीत सरासरी वीजबिलांचा भरणा केला असल्यास जूनमधील तीन महिन्यांच्या एकत्रित वीज बिलामध्ये एप्रिल व मे महिन्यांचा स्थिर आकार व विद्युत शुल्क वगळता उर्वरित रक्कम समायोजित करण्यात येत आहे. यासंबंधीची माहिती ग्राहकांसाठी वीजबिलामध्ये नमूद करण्यात येत आहे. लॉकडाऊनमध्ये ग्राहकांना हिवाळय़ातील वीज वापराप्रमाणे सरासरी देयके पाठविण्यात आली होती. मात्र, ऐन उन्हाळय़ात लॉकडाऊनमध्ये वाढलेला प्रत्यक्ष वीजवापर व 1 एप्रिलपासून लागू झालेले नवीन वीजदर यामुळे एप्रिल, मे व जून महिन्यांचे मासिक परंतु एकत्रित दिलेले वीजबिल अधिक युनिटचे व रकमेचे असण्याची शक्मयता असल्याचे महावितरणकडून सांगण्यात आले.
अतिरिक्त भुर्दंड लावलेला नाही!
एप्रिल, मे व जून महिन्यांचे वीजबिल वीजग्राहकांना एकत्रित परंतु, स्वतंत्र मासिक हिशेबानुसार देण्यात आले आहे. हे तीन महिन्यांचे जूनमध्ये देण्यात आलेले वीजबिल अचूक आहे. योग्य स्लॅब व वीजदरानुसार तसेच प्रत्यक्ष वीजवापरानुसारच आहे. एका पैशाचाही अतिरिक्त भुर्दंड या वीजबिलामध्ये लावण्यात आलेला नाही. त्यामुळे वीजग्राहकांनी कोणताही संभ्रम न ठेवता वीजबिल दुरुस्तीसाठी कार्यालयात गर्दी करू नये, असे आवाहन करण्यात आले आहे.
