शेतकरी संघटनेचे आज राज्यव्यापी आंदोलन

बेंगळूर : कोरोनामुळे शेतकऱयांपुढे निर्माण झालेल्या समस्या सोडविण्याची मागणी करून कर्नाटक राज्य शेतकरी संघटना गुरुवारी राज्यव्यापी आंदोलन छेडणार आहे. राज्यातील सर्व जिल्हाधिकारी कार्यालये आणि तालुका कार्यालयांसमोर सकाळी 11 ते 11.30 या वेळेत शेतकरी संघटनेचे सदस्य निदर्शने करणार आहेत, अशी माहिती शेतकरी संघटनेचे अध्यक्ष बडगलपूर नागेंद्र यांनी म्हैसूर येथे पत्रकार परिषदेत दिली. लॉकडाऊनमुळे शेतकऱयांचे झालेल्या नुकसानीचा अहवाल तयार करण्याचा तज्ञांची समिती नेमण्यासह विविध दहा मागण्यांचे निवेदन मुख्यमंत्र्यांकडे दिले आहे. या मागण्यांची पूर्तता करावी, असा दबाव सरकारवर आणण्यात येणार आहे. मागण्यांची पूर्तता करण्यास सरकार अपयशी ठरल्यास आगामी काळात राज्यभरात तीव्र आंदोलन छेडण्यात येईल, असा इशारा त्यांनी दिला.