मुंबई \ ऑनलाईन टीम
मोदी सरकारने खतांच्या दरवाढीसंदर्भात मोठा निर्णय घेतला आहे. डीएपी खतांवर १२०० रुपयांचं अनुदान देण्याचा निर्णय मागे घेतला आहे. डीएपीची एक पोतं आता २४०० ऐवजी १२०० रुपयांना मिळणार आहे. मोदी सरकारने हा निर्णय घेताच राष्ट्रवादी काँग्रेस पक्षानं एक ट्विट केलं आहे. केंद्रीय खत व रसायन मंत्री सदानंद गौडा यांनी शरद पवारांच्या पत्राची दखल घेतली असल्याचं, राष्ट्रवादीनं म्हटलं आहे. एनसीपीच्या अधिकृत ट्वीटर हँडलवरून याविषयी मीहिती देण्यात आली आहे.
एनसीपीच्या अधिकृत ट्वीटर याविषयी माहिती देत म्हटले आहे की, रासायनिक खतांचे वाढलेले दर केंद्र सरकारने कमी करावे, केंद्रीय खत व रसायन मंत्री डी. व्ही. सदानंद गौडा यांना या प्रकरणी वैयक्तिकरीत्या लक्ष घालावे आणि किमतीतील वाढ लवकरात लवकर मागे घ्यावी अशी विनंती खासदार शरद पवार यांनी मंगळवारी एका पत्राद्वारे केली होती.
या पत्राची दखल घेत केंद्रीय मंत्र्यांनी आज शरद पवार यांच्याशी फोनवर चर्चा केली. पत्रातील सूचनांचा अभ्यास करून पुढील दोन दिवसांत दरवाढ मागे घेण्याबाबतचा निर्णय घेऊ, असे त्यांनी शरद पवार यांना आश्वाशन दिले होते. राष्ट्रवादी काँग्रेसच्या या ट्विटनंतर काही तासांतच केंद्र सरकारने खत दरवाढीचा निर्णय मागे घेतला.
