शेळीला वाचवताना पाय घसरून पडल्याने दुर्घटना
हातनूर / वार्ताहर
विसापूर ता तासगाव येथील एका महिलेचा शेततळ्यात पाय घसरून पडल्याने मृत्यू झाला. ही घटना आज दुपारी तीनच्या दरम्यान घडली. कमल आनंद जाधव (वय- ६५) असे या महिलेचे नाव आहे. या घटनेची तासगाव पोलिसात नोंद आहे.
याबाबत घटनास्थळ व पोलिसांकडून मिळालेली माहिती अशी, येथील सौ. कमल जाधव शेळ्या चरावयास घेऊन खानापूर रस्त्यावरच्या कुंभार टेक परिसरात गेल्या होत्या. या ठिकाणी शिवाजी माने यांचे शेततळे आहे. शेततळ्यामध्ये एक शेळी पाणी प्यायला गेली असता पाय घसरून पाण्यात पडली. शेळीला वाचविण्याचा सौ.जाधव यांनी प्रयत्न केला. मात्र शेततळ्याचा अंदाज न आल्याने त्यांचा बुडून मृत्यू झाला असे समजते. याबाबतची तासगाव पोलीसांत पोलीस पाटील संदीप पाटील यांनी वर्दी दिली.
पोलिसांनी पंचनामा करून शवविच्छेदनासाठी मृतदेह पाठवून दिला असून पोलीस कॉन्स्टेबल ए.पी. ठाकरे व पोलीस कॉन्स्टेबल दत्ता पाटील या घटनेचा अधिक तपास करत आहेत. आज शेततळ्यात बुडून मृत्यू झालेल्या सौ.कमल जाधव यांच्या सख्या जाऊबाई चा गेल्या आठवड्यात तर काल चुलत दीराचा मृत्यू झाला.त्यामुळे अवघ्या पाच दिवसांत एकाच घरातील तिघांचा मृत्यू झाला.
