पंतप्रधानांसह अन्य मंत्रिमंडळ सदस्य सुदैवाने बचावले
नवी दिल्ली / वृत्तसंस्था
येमेनमधील एडन विमानतळावर गुरुवारी मोठा बॉम्बस्फोट झाला. या बॉम्बस्फोटामध्ये 25 जणांचा मृत्यू झाला आहे, तर 50 हून अधिक जखमी झाले आहेत. येमेनचे पंतप्रधान मईन अब्दुलमलिक सईद यांच्या नव्या मंत्रिमंडळातील सदस्यांना घेऊन एक विमान एडन विमानतळावर पोहचल्यानंतर काही क्षणांत हा स्फोट झाला. सर्व मंत्री सौदी अरेबियातून परतले होते. या स्फोटात पंतप्रधान मईन अब्दुलमलिक सईद यांच्यासह मंत्रिमंडळातील सर्व सदस्य सुखरुप आहेत. मात्र, स्फोट झालेल्या भागात उपस्थित असलेल्या जवळपास 25 जणांचा मृत्यू झाल्याची माहिती सरकारी सूत्रांनी दिली आहे. विमानातून आलेले संपूर्ण मंत्रिमंडळ आणि इतर सरकारी प्रतिनिधी सुखरूप असल्याचे अधिकाऱयांकडून सांगण्यात आले. दरम्यान, भारताने या हल्ल्याचा कडक शब्दात निषेध नोंदवला आहे.
प्रत्यक्षदर्शींनी दिलेल्या माहितीनुसार विमानतळावर दोन स्फोट झाले. घटनास्थळाचे काही फोटो सोशल मीडियावर व्हायरल झाले असून त्यावरून स्फोटाची तीव्रता किती जास्त होती हे स्पष्ट होत आहे. विमानतळावर काही मृतदेह विखुरलेल्या अवस्थेत पडल्याचे त्यात दिसून येत होते. या हल्ल्याची जबाबदारी अद्याप कोणीही घेतलेली नाही. तथापि, माहिती, संस्कृती आणि पर्यटन मंत्री मोअम्मर अल इरायणी यांनी या हल्ल्यामागे इराण समर्थीत हुथी बंडखोरांचा हात असल्याचा संशय व्यक्त केला आहे. स्फोटाबाबत सरकारी प्रवक्त्यांकडून अद्याप अधिकृत माहिती देण्यात आलेली नसली तरी एका अधिकाऱयाने नाव उघड न करण्याच्या अटीवर माध्यमांना घटनेचा तपशील दिला आहे.
