प्रतिनिधी / बेळगाव
शांताई वृद्धाश्रम संचालित विद्या आधार रद्दीतून बुद्धीकडे उपक्रमातील या वषीच्या 52 लाभार्थींना विद्याधन वितरणाचा कार्यक्रम झाला. भाऊराव काकतकर कॉलेजच्या सभागृहात गुरुवारी कार्यक्रमाचे आयोजन केले होते.
दक्षिण महाराष्ट्र शिक्षण मंडळाचे सचिव प्रा. व्ही. एल. पाटील प्रमुख पाहुणे म्हणून उपस्थित होते. भाऊराव काकतकर कॉलेजचे प्राचार्य डॉ. एस. एन. पाटील, विद्या आधारचे अध्यक्ष विनायक लोकूर, सेपेटरी विजय मोरे आणि संयुक्त सचिव संतोष ममदापूर आदी मान्यवर व्यासपीठावर होते. प्रारंभी संतोष ममदापूर यांनी स्वागत केले. विनायक लोकूर यांनी विद्या आधारच्या स्थापनेचा उद्देश विशद केला. पैसे नाहीत आणि आधार नाही यामुळे अनेकांचे शिक्षण अडले जाऊ नये यासाठी विद्या आधारची स्थापना करण्यात आली असून आजवर 400 हून अधिक विद्यार्थ्यांना लाखो रुपयांची मदत केली आहे. अशी माहिती त्यांनी दिली. यानंतर विजय मोरे यांनी विद्या आधारच्या माध्यमातून बेळगावतच नव्हे तर कोल्हापूरसारख्या ठिकाणीही अनेक विद्यार्थ्यांना कशी मदत मिळवून दिली याची माहिती दिली. यानंतर विद्याधन वितरित करण्यात आले.
प्राचार्य डॉ. एस. एन. पाटील यांनी विद्याआधार व भाऊराव काकतकर कॉलेज यांच्या माध्यमातून समन्वय करार करून विद्यार्थ्यांना मदत करण्याचा प्रस्ताव बोलून दाखविला. प्रा. व्ही. एल. पाटील यांनी या उपक्रमाला शुभेच्छा दिल्या. ऍलन मोरे यांनी आभार मानले.
