तिसरे जिल्हासत्र न्यायालयाचा निकाल
प्रतिनिधी/ बेळगाव
अल्पवयीन मुलीला लग्नाचे आमिष दाखवून तिच्यावर बलात्कार करणाऱया नराधमाला तिसरे अतिरीक्त जिल्हा सत्र न्यायालयाने जन्मठेप आणि दहा हजार रूपये दंड अशी शिक्षा सुनावली आहे. आडवय्या शंकरय्या पुजारी (वय 30) रा. कादरवळ्ळी ता. कित्तूर असे शिक्षा झालेल्या नराधमाचे नाव आहे.
आडवय्या याने एका अल्पवयीन मुलीवर लैंगिक अत्याचार केले होते. त्यानंतर ती गर्भवती राहिली. याप्रकरणी तिच्या कुटुंबियांनी कित्तूर पोलिस स्थानकामध्ये त्याच्या विरोधात फिर्याद नोंदविली. पोलिसांनी 376 (2) आणि पोक्सो कायदा 4 आणि 6 अन्वये गुन्हा दाखल केला. तिसरे अतिरीक्त जिल्हा सत्र न्यायालयामध्ये पोलिस निरीक्षक राघवेंद्र हवालदार यांनी दोषारोप दाखल केले. त्याठिकाणी 13 साक्षी, 81 कागदपत्रे आणि एक मुद्देमाल तपासण्यात आला. त्यामध्ये आडवय्या हा दोषी आढळला. न्यायाधीश मंजप्पा अन्नयनावर यांनी आडवय्या याला जन्मठेप आणि दहा हजार रूपये दंड अशी शिक्षा सुनावली आहे. याचबरोबर सदर मुलीला 2 लाख रूपये जिल्हा कायदा सेवा प्राधिकार यांनी द्यावी असा आदेशही देण्यात आला आहे. या खटल्यात सरकारी वकील म्हणून एल. व्ही. पाटील यांनी काम पाहिले.
