वृत्तसंस्था/ ढाका
मंगळवारी येथे झालेल्या वनडे मालिकेतील दुसऱया सामन्यात यजमान बांगलादेशने लंकेला विजयासाठी 247 धावांचे आव्हान दिले. प्रथम फलंदाजी करताना बांगलादेशचा डाव 48.1 षटकांत 246 धावांत आटोपला. बांगलादेशतर्फे मुशफिकुर रहीमने शानदार शतक (125) झळकविले.
तीन सामन्यांच्या या मालिकेत बांगलादेशने पहिला सामना जिंकून लंकेवर आघाडी यापूर्वी मिळविली आहे. या दुसऱया सामन्यात लंकेच्या अचूक गोलंदाजीसमोर बांगलादेशचा डाव 48.1 षटकांत 246 धावा समाप्त झाला. मुशफिकुर रहीमच्या शतकामुळे बांगलादेशला 200 धावांचा टप्पा ओलांडता आला. लंकेच्या भेदक गोलंदाजीसमोर बांगलादेशचे फलंदाज ठराविक अंतराने बाद झाले. मुशफिकुर रहीमने 127 चेंडूत 10 चौकारांसह 125 तर मेहमुदुल्लाने 58 चेंडूत 2 षटकार आणि 1 चौकारांसह 41, दासने 2 चौकारांसह 25, कर्णधार तमीम इक्बालने 3 चौकारांसह 13, सैफूद्दीनने 11, एम हुसेन आणि ए हुसेन यांनी प्रत्येकी 10 धावा जमविल्या. रहीम आणि मेहमुदुल्ला यांनी पाचव्या गडय़ासाठी 85 धावांची भर घातली. बांगलादेशच्या डावात 2 षटकार आणि 19 चौकार नोंदविले गेले. लंकेतर्फे चमिरा आणि संदकन यांनी प्रत्येकी 3 तसेच उदाणाने दोन आणि हसरंगाने 1 गडी बाद केला.
संक्षिप्त धावफलक
बांगलादेश 48.1 षटकांत सर्वबाद 246 (मुशफिकुर रहीम 125, मेहमुदुल्ला 41, दास 25, तमीम इक्बाल 13, सैफूद्दीन 11, एम हुसेन 10, ए हुसेन 10, चमिरा 3-44, संदकन 3-54, उदाना 2-49, हसरंगा 1-33).
