नवी दिल्ली \ ऑनलाईन टीम
खासदार संजय राऊत संसदेच्या पावसाळी अधिवेशनासाठी दिल्लीत आहेत. दिल्लीमध्ये खासदार आणि मंत्र्यांच्या भेटीगाठी होत आहेत. शिवसेना नेते संजय राऊत यांनी दिल्लीत काँग्रेस माजी अध्यक्ष आणि खासदार राहुल गांधी यांची भेट घेतली आहे. संजय राऊत आणि राहुल गांधींच्या भेटीवरुन महाराष्ट्रातील राजकीय वर्तुळात चर्चा सुरु झाल्या आहेत. राहुल गांधी यांची भेट घेतली असल्याचे संजय राऊत यांनी स्वतः सांगितले आहे.
संजय राऊत यांनी ट्विट करत खासदार राहुल गांधी यांची भेट घेतली असल्याची माहिती दिली आहे. “खासदार राहुल गांधी यांच्याशी आज भेट झाली. गांधी यांच्याशी महाराष्ट्र तसेच राष्ट्रीय राजकारणावर सविस्तर चर्चा झाली. राज्य सरकारच्या कामा विषयी त्यांनी समाधान व्यक्त केले. शिवसेनेची जडणघडण तसेच कार्यपद्धती बाबत त्यांनी जाणून घेतले” अशी माहिती संजय राऊत यांनी ट्विट करुन दिली आहे.
संजय राऊत यांनी राहुल गांधी यांची भेटीनंतर राजकीय वर्तुळात विविध चर्चांना उधाण आले आहे.
