- 4 गाड्या एकमेकांना धडकल्या ; जीवितहानी नाही
ऑनलाईन टीम / रामपूर :
प्रजासत्ताक दिनी दिल्लीतील शेतकऱ्यांनी काढलेल्या ट्रॅक्टर रॅलीत जीव गमावलेल्या नवरीत सिंग यांच्या मृत्यूनंतर राजकारण चांगलेच तापल आहे. काँग्रेसच्या महासचिव प्रियांका गांधी आज नवरीत सिंग यांच्या कुटुंबियांना भेटण्यासाठी रामपूरला जात आहेत. त्या दरम्यान, प्रियांका गांधीच्या ताफ्यात अपघात झाला आहे. उत्तर प्रदेशातील हापूड रोडवर ही घटना घडली.
मिळालेल्या माहितीनुसार, प्रियांका गांधींच्या ताफ्यातील चार गाड्या एकमेकांना धडकल्या. ताफ्यातील पुढच्या गाडीचालकाने अचानक ब्रेक लावला, त्यामुळे मागील गाड्या एकमेकांवर आदळल्या. मात्र या घटनेत कुणीही जखमी झालेले नाही.
दरम्यान, राष्ट्रीय लोक दलाचे नेते जयंत चौधरी देखील आज सिंग यांच्या कुटुंबियांना भेटण्यासाठी जाणार आहेत. आज नवरीत सिंग यांचा दहाव्याचा कार्यक्रम आहे. या कार्यक्रमात प्रियांका गांधी सहभागी होणार आहेत.
ट्रॅक्टर रॅलीनंतर पोलिसांनी एक व्हिडीओ शेअर केला होता. ज्यामध्ये आयटीओजवळ पोलिस बॅरीकेड तोडण्याच्या प्रयत्नात असणारा एक भरधाव वेगाने येणारा ट्रॅक्टर पलटी झाला. या ट्रॅक्टरखाली दबून नवरीत सिंग यांचा मृत्यू झाला. शवविच्छेदन अहवालात देखील सिंग यांच्या मृत्यूचे कारण अपघात सांगितले आहे.
