बेंगळूर/प्रतिनिधी
राज्यातील ६ वी ते ८ वी च्या शाळा २२ फेब्रुवारीपासून सुरू केल्या जातील, अशी माहिती प्राथमिक व माध्यमिक शिक्षणमंत्री एस. सुरेश कुमार यांनी पत्रकार परिषदेत दिली. दरम्यान केरळच्या सीमेवरील जिल्ह्यात केवळ आठवीच्या शाळा उघडतील. ६ वी आणि ७ वी चे वर्ग सुरु करण्याबाबत जिल्हा उपायुक्त निर्णय घेतील.
केरळमधील कोविडच्या वाढत्या घटनांचा विचार करता सरकारने खबरदारी म्हणून हा निर्णय घेतला आहे. कोविड टेक्निकल अ‍ॅडव्हायझरी कमिटी (टीटीएसी) यांच्याशी चर्चा केल्यानंतर शाळा सुरू करण्याचे मान्य केले आहे.
पहिली ते पाचवीपर्यंतच्या मुलांसाठी विद्यागम योजना
शिक्षणमंत्र्यांनी सांगितले की पहिली ते पाचवीपर्यंतच्या मुलांसाठी विद्यागम शिक्षण कार्यक्रम सुरू करायचा आहे. या संदर्भात ते टीटीएसी सदस्यांशी सल्लामसलत करतील. २४ किंवा २५ फेब्रुवारी रोजी बैठक होणार आहे. राज्यातील २०२१-२२ शैक्षणिक वर्ष हे १५ जुलैपासून सुरू होणार आहे.
परवानगी पत्र आवश्यक
पालक, शैक्षणिक संस्था, शालेय विकास आणि देखरेख समितीने बर्‍याच काळापासून शाळा सुरू करण्याची मागणी केली होती. पण टप्प्याटप्प्याने शाळा सुरू करायच्या अशी सरकारची इच्छा होती. वर्ग सुरू झाल्यानंतरही कोणत्याही पालकांवर मुलांना शाळेत पाठविण्यावर दबाव आणला जाणार नाही असे त्यांनी स्पष्ट केले. मुलांना पालकांच्या परवानगी पत्रावरूनच शाळेत प्रवेश मिळू शकेल.
कोविड नकारात्मक प्रमाणपत्र केरळमधून येणारे विद्यार्थी आणि शिक्षकांसाठी अनिवार्य आहे. पुढील काही दिवसांमध्ये शाळांसाठी प्रमाणित ऑपरेटिंग प्रक्रिया सुरू राहील. शाळेचालकांना त्याचे काटेकोरपणे पालन करावे लागेल.
