14 ठिकाणच्या आगी आटोक्यात आणण्यात यश : विश्वजित राणे
आवश्यक ते मदत करण्याचे संरक्षणमंत्री राजनाथसिंह यांचे आश्वासन
विशेष प्रतिनिधी/ पणजी
गोव्यातील आगीच्या वणव्याची पुन्हा एकदा पंतप्रधान कार्यालयाने माहिती मागितली. राज्यात नव्याने कोळंब कुर्डी, किनाळकट्टा काणकोण, आवळी – काणकोण, पाटे नेत्रावळी, सोनशी – सत्तरी या सरकारी वनक्षेत्रात आगी लागल्या. आग भगवान महावीर अभयारण्यातही पोहोचली. वनमंत्री विश्वजित राणे यांनी 14 ठिकाणी आग आटोक्यात आणण्यात शनिवारी यश मिळविल्याची माहिती दिली. मात्र त्याचबरोबर अद्याप 9 ठिकाणी आगीचा भडका चालूच आहे. राज्यातील वनस्पती सुरक्षित असल्याचा दावाही मंत्री राणे यांनी केला. नौदलाच्या दोन हेलिकॉप्टर्सनी शनिवारी पाण्याची फवारणी केली. केंद्रीय संरक्षणमंत्री राजनाथसिंह यांनी गोव्याला आवश्यक ती सर्व मदत द्या, असे पश्चिम क्षेत्रीय नौदल विभागाला कळविले आहे. गरज पडल्यास आज रविवारी जादा हेलिकॉप्टर्स पाठविली जातील.
गोव्यात आगीचा वणवा अद्याप चालूच आहे. 14 ठिकाणी आग आटोक्यात आणण्यात यश आल्याची माहिती वनमंत्री विश्वजित राणे यांनी दिली. आग नियंत्रणात आणण्यासाठी स्थानिकांची तसेच कार्यकर्त्यांचीही मदत घेतली जात आहे. आपण सातत्याने अतिरिक्त प्रधान वनपाल यांच्या संपर्कात आहे व आपल्याला संपूर्ण अहवाल मिळत आहे. संरक्षणमंत्री राजनाथसिंह यांनी आवश्यक ते सर्व सहकार्याचे आश्वासन दिले व त्याची शिताफीने अंमलबजावणी सुऊ देखील केली आहे.
दुर्मीळ वनस्पती सुरक्षित : विश्वजित राणे
मोठ्या प्रमाणात सरकारी वनक्षेत्रात आगीचा वणवा पेटला असला तरी देखील अनेक दुर्मीळ वनस्पती सुरक्षित असल्याचा दावा मंत्री विश्वजित राणे यांनी केला. अनमोड घाट – मोले अभयारण्य, साट्रे, घालप मोले, आगलोट – साकोर्डा, तिवरे – फोंडा, बेतोडा-फोंडा इथे सरकारी व सोनशी – सत्तरी येथील खासगी वनक्षेत्रालाही आगीने घेरले मात्र या ठिकाणी आग आटोक्यात आणण्यात यश आले. तर पाटे – नेत्रावळी, आवळी काणकोण, किनळकट्टा काणकोण, धर्मापूर -सारझेटा येथील खासगी वनक्षेत्र कोळंब कुर्डी सरकारी वनक्षेत्र, वास्को येथील खासगी वनक्षेत्र व साट्रे पारोड येथील सरकारी वनक्षेत्रात आगीचा भडका उडालेला आहे.
530 जवान आग विझविण्यासाठी कार्यरत
राज्यातील विविध ठिकाणी जिथे आगी लागलेल्या आहेत त्या दरम्यान 530 जवान प्रत्यक्षात आग विझविण्याचे काम करीत आहेत. देरोडे – डोंगर, सुर्ला – मोले, मोले भागातील सुर्ला गावातील वनक्षेत्र, धारबांदोडा, कुळे पट्ट्यात आगीचा भडका अद्याप चालूच आहे. याशिवाय पोत्रे, नेत्रावळी, कुमारी-नेत्रावळी हे दोन्ही नेत्रावळी अभयारण्यातील वनक्षेत्र आहे. कोपर्डे वाळपई येथील सरकारी व खासगी वनक्षेत्र तसेच शिगाव व पोकेमळ येथील जंगलांमध्येही आग चालू आहे.
भारतीय नौदलाच्या जवानांनी तसेच हेलिकॉप्टर्सनी बरीच मदत केल्याची माहिती वनमंत्री विश्वजित राणे यांनी दिली.
पंतप्रधानांचे मानले आभार
तत्काळ मदत केल्याबद्दल मदत केल्याबद्दल वनमंत्री विश्वजित राणे यांनी पंतप्रधान नरेंद्र मोदी, संरक्षणमंत्री राजनाथसिंह तसेच केंद्रीय पर्यावरण मंत्रालय व मंत्र्यांचेही वनमंत्र्यांनी आभार मानले.
शुक्रवारपासून शनिवारपर्यंतच्या कालावधीत अर्थात मध्यरात्रीच्या दरम्यान सहा ठिकाणी नव्याने आगी लागल्याचे आढळून आल्याचे मंत्री विश्वजित राणे यांनी स्पष्ट केले. दरम्यान, कोपर्डे, म्हाऊस या परिसरातील युवावर्गाने पुढाकार घेऊन अशा विझविण्यासाठी अथक प्रयत्न केले त्याबद्दल त्या सर्व युवावर्गाचे वनमंत्री विश्वजित राणे यांनी आभार मानले.
