मॅरेथॉनमध्ये 2000 नागरिकांची सहभाग नोंदणी
प्रतिनिधी/ रत्नागिरी
महाराष्ट्र शासन उद्योगमंत्री तथा रत्नागिरीचे पालकमंत्री उदय सामंत व रायगड जिल्हा आणि जिल्हा प्रशासन यांच्या संयुक्त विद्यमाने रविवार 19 फेब्रुवारी रोजी छत्रपती शिवाजी स्टेडीअम येथे फिट रत्नागिरी हॅप्पी मॅरेथॉन 2023 स्पर्धेचे आयोजन करण्यात आले आहे. या स्पर्धेत विविध वयोगटात व विविध अंतरासाठी 2000 नागरिकांनी सहभाग नोंदवला आहे.
फिट रत्नागिरी हॅप्पी मॅरेथॉन 2023 स्पर्धेसाठी नोंदणी केलेल्या धावपटूंना टीशर्ट आणि बोब नंबर जिल्हा क्रीडा कार्यालय येथे शनिवार 18 फेब्रुवारी रोजी सकाळी 11 ते 6 या वेळेत वितरित केले जाणार आहेत. स्पर्धेसाठी सर्व धावपटूंनी सकाळी 5 वाजता छत्रपती शिवाजी स्टेडिअम रत्नागिरी येथे उपस्थित रहावयाचे आहे. स्पर्धेला छत्रपती शिवाजी महाराज स्टेडीअम, रत्नागिरी येथून प्रारंभ होणार आहे. सकाळी 5 वाजता खेळाडूंच्या वॉर्मअपसाठी झुंबा डांसचे आयोजन करण्यात आले असून सकाळी 5.45 वा. 21 कि.मी. स्पर्धेस प्रारंभ होईल. त्यानंतर पुढील सर्व स्पर्धा 20 मिनिटांच्या अंतराने सुरु होतील. 21 कि.मी. स्पर्धा छत्रपती शिवाजी महाराज स्टेडीअम रत्नागिरी येथून प्रारंभ होऊन जयस्तंभमार्गे पावस रोड येथील मुकूल माधव शाळेजवळून परत फिरेल आणि छत्रपती शिवाजी महाराज स्टेडीअम येथे पूर्ण होईल. स्पर्धा पूर्ण झाल्यानंतर प्रत्येक गटातील तीन याप्रमाणे म्हणजे 36 विजेत्यांना रोख रक्कम, पदकं आणि प्राविण्य प्रमाणपत्र देऊन गौरवण्यात येणार आहे. तसेच सहभागी झालेल्या सर्व धावपटूंना सहभाग प्रमाणपत्र वितरित करण्यात येतील.
