प्रतिनिधी / धारबांदोडा
मोले ग्रामपंचायतीच्या उपसरपंचपदी बाबू शेळके यांची बिनविरोध निवड झाली आहे. माजी उपसरपंच सुशांत भगत यांच्यावर दाखल केलेला अविश्वास ठराव संमत झाल्यानंतर हे पद रिक्त होते.
रामकृष्ण गावकर, स्नेहलता नाईक, बाबू शेळके, राजेश सांगोडकर व सरपंच तन्वी केरकर यांनी उपसरपंच सुशांत भगत यांच्यावर अविश्वास ठराव दाखल केला होता. 24 एप्रिल रोजी तो संमत करण्यात आला होता. काल शुक्रवारी झालेल्या उपसरपंचपदाच्या निवडणुकीत बाबू शेळके यांचा एकमेव अर्ज दाखल झाल्याने त्यांची बिनविरोध निवड करण्यात आली. यावेळी सरपंच तन्वी केरकर, स्नेहलता नाईक, राजेश सांगोडकर, रामकृष्ण गावकर उपस्थित होते. सुशांत भगत व समर कदम गैरहजर होते. निर्वाचन अधिकारी म्हणून गटविकास कार्यालयाचे अभियंता विस्तार अधिकारी हेमंत गांवस उपस्थित होते. त्यांना सचिव खुशालदास गांवकर यांनी साहाय्य केले.
