तरुण भारत संवाद प्रतिनिधी / माळशिरस
घुलेवस्ती (ता. माळशिरस) येथे दोन मोटार सायकलची समोरासमोर धडक होऊन मोटार सायकल वरील दोन जण ठार झाल्याची घटना आज सायंकाळी पाच वाजण्याच्या सुमारास घडली.
याबाबत पोलीस सुत्रांकडुन मिळालेली माहिती अशी की, सांगवी (ता. फलटण) येथील हणुमंत शंकर बेलदार (वय ४२) (रा. सांगवी ता. फलटण जि. सातारा) हे आपल्या बुलेट मोटार सायकल क्र. (एमएच ११ सीके २७२७) वरुन आपली सासरवाडी (जत जि. सांगली) कडे निघाले होते. तर माळशिरस येथील रावसाहेब सिद (वय ४५) हे आपले शेतातील काम करून खुडूस कडुन माळशिरस कडे आपल्या फॅशन प्रो मोटार सायकल क्र. (एमएच ४५ सी ४९९३) वरून येत होते. पुणे-पंढरपूर पालखी मार्गावर घुलेवस्ती जवळ दोन्ही मोटार सायकलींची समोरासमोर धडक झाली. ही धडक एवढी जोरात झाली की अपघातात दोन्ही मोटार सायकल चालक जागेवरच ठार झाले. हणुमंत बेलदार हे फलटण एसटी आगारात चालक म्हणुन काम करीत होते.
