प्रतिनिधी/ बेळगाव
राज्यात कोरोना आणि ओमिक्रॉन रुग्णांच्या संख्येत झपाटय़ाने वाढ होत आहे. या पार्श्वभूमीवर शनिवार आणि रविवार विकेंड कर्फ्यू जारी करण्यात आला आहे. त्यामुळे शनिवारी विकेंड कर्फ्यूच्या पहिल्या दिवशीच बससेवेला प्रवाशांचा प्रतिसाद कमी झालेला पहायला मिळाला. विविध मार्गावर बसेस धावल्या असली तरी प्रवाशांची संख्या नगण्य असल्याचे पहायला मिळाले.
मध्यवर्ती बसस्थानकात उचगाव, सुळेभावी, वडगाव, अनगोळ, राणी चन्नम्मा विद्यापीठ, देवराज अर्स कॉलनी, होनगा, बस्तवाड, मजगाव, मण्णीकेरी, धामणे, अलारवाड, राजगोळी, मुचंडी आदी बसेस थांबून होत्या. बसचालक व वाहक प्रवाशांच्या प्रतीक्षेत बसलेले पहायला मिळाले. याबरोबरच बागलकोट, हुबळी, चिकोडी, धारवाड, अथणी, दावणगेरी, हुक्केरी, बैलहोंगल, सौंदत्ती, गोकाक, बिडी या लांब पल्ल्याच्या बसगाडय़ा दाखल झाल्या होत्या. मात्र या बसनादेखील प्रवाशांचा प्रतिसाद कमी असलेला पहायला मिळाला.
विकेंड कर्फ्यूच्या धास्तीने प्रवासी बाहेर पडले नाहीत. त्यामुळे स्थानिक बसेसना देखील प्रवासी मिळाले नाहीत. सकाळच्या सत्रात काही बसेसना मोजकेच प्रवासी दिसत होते. तर काही बस रिकाम्या फिरताना पहायला मिळाल्या. त्यामुळे परिवहनला देखील याचा फटका बसला आहे. प्रवाशांची ये-जा थांबल्याने स्थानिक बस आगारात थांबून होत्या. त्यामुळे बसथांब्यात प्रवाशांपेक्षा शनिवारी बसचालक आणि बसवाहकांचीच संख्या अधिक दिसून आली.
लांब पल्ल्याच्या बसना काही प्रमाणात प्रवाशांची संख्या दिसत होती. मात्र स्थानिक बस प्रवाशांअभावी बसस्थानकात थांबून होत्या. सकाळच्या सत्रात काही बसच्या एक दोन फेऱया झाल्या. मात्र दुपारनंतर प्रवाशांची संख्या रोडावल्याने बससेवा थांबली होती. परिवहनने प्रवाशांची गैरसोय रोखण्यासाठी प्रवाशांची संख्या लक्षात घेऊन बस सेवा सुरू राहणार असल्याचे सांगितले होते. मात्र काही ठिकाणी प्रवासी नसल्याने बस रिकाम्या धावत होत्या. तर काही बस प्रवाशांअभावी बंद ठेवाव्या लागल्या.
परिवहनला फटका
परिवहनच्या बेळगाव विभागाला दैनंदिन बसच्या माध्यमातून 60 ते 70 लाख रुपयांचा महसूल मिळतो. मात्र शनिवारी प्रवाशांची संख्या रोडावल्याने परिवहनच्या महसूलावर पाणी फिरले आहे. आधिच दीड वर्षापासून परिवहन कोरोनामुळे आर्थिकदृष्टय़ा अडचणीत सापडले आहे. गतवर्षी परिवहनला 110 कोटींचा फटका बसला होता. कोरोनाच्या दोन लाटेत परिवहनला मोठा तोटा सहन करावा लागला आहे. त्यातच आता तिसऱया लाटेने कहर केल्याने परिवहन अडचणीत सापडले आहे.
वातानुकूलित बस धावली
शनिवारी सकाळी मध्यवर्ती बसस्थानकातून बेळगाव-बेंगळूर ही वातानुकूलित बस नेहमीप्रमाणे बेंगळूरला धावली. मात्र या बसला देखील प्रवाशांची संख्या मोजकीच होती. कोरोनाच्या पार्श्वभूमीवर परिवहनने प्रवाशांच्या सोयीखातर तिकिट बुकिंग करण्यासाठी ऍप सुरू केला आहे. तसेच ऑनलाईन तिकिट बुकिंगची सेवा देखील सुरू ठेवली आहे. प्रवासी घरबसल्या ऑनलाईन तिकीट बुकिंग करून प्रवास करू शकतात.
विकेंड कर्फ्यूत प्रवाशांनी पाठ फिरवली असली तरी सोमवारपासून प्रवाशांची संख्या पूर्ववत होईल आणि बससेवेला प्रवासी उपलब्ध होतील. विकेंड काळात शाळा, महाविद्यालये बंद असल्याने प्रवाशांची संख्या घटली आहे. मात्र सोमवारपासून शाळा, महाविद्यालये पूर्ववत सुरू होतील, त्यामुळे प्रवाशांचा प्रतिसाद वाढेल आणि बससेवा देखील पूर्वपदावर येईल अशी आशा परिवहनला आहे.
कोरोना नियमांचे पालन करून प्रवाशांना बससेवा उपलब्ध ः पी. वाय. नाईक (विभागीय नियंत्रण अधिकारी केएसआरटीसी)
विकेंड कर्फ्यूच्या काळात सर्व प्रकारची बससेवा सुरू ठेवली आहे. प्रवाशांची मागणी आणि संख्या लक्षात घेऊन बसेस विविध ठिकाणी धावणार आहेत. स्थानिक बसबरोबर लांब पल्ल्याच्या बस देखील सुरू ठेवल्या आहेत. कोरोना नियमांचे पालन करून प्रवाशांना बससेवा उपलब्ध करून दिली जात आहे.
