मृणाल हेब्बाळकर यांच्याकडून वाघनखे वनखात्याला सुपूर्द

बेळगाव : संपूर्ण राज्यात सुरू असलेली वाघनखांची तपासणी बेळगावातही सुरू आहे. शुक्रवारी महिला व बालकल्याण खात्याच्या मंत्री लक्ष्मी हेब्बाळकर यांच्या निवासस्थानी वनखात्याच्या अधिकाऱ्यांनी तपास केला असून त्यांच्या मुलाने अधिकाऱ्यांकडे आपल्याजवळील वाघनख परत केले आहे. मृणाल हेब्बाळकर यांच्या गळ्यात वाघनखांचे पेंडंट असल्याची छायाचित्रे सोशल मीडियावर व्हायरल झाल्यानंतर शुक्रवारी वनखात्याच्या अधिकाऱ्यांनी त्यांच्या घरी भेट देऊन पाहणी केली. या पेंडंट संदर्भात चौकशीही करण्यात आली. त्यावेळी मृणाल हेब्बाळकर यांनी अधिकाऱ्यांकडे आपल्या गळ्यातील पेंडंट सोपविले. तपासणीनंतर वनविभागाच्या अधिकाऱ्यांनी सांगितले की मृणाल हेब्बाळकर यांनी आपल्याजवळील पेंडंट सोपविले आहे. ते तपासणीसाठी प्रयोगशाळेला पाठविण्यात येणार आहे. त्यांची जबानीही घेण्यात आली आहे. चौकशीसाठी ते सहकार्य करीत आहेत. वरिष्ठ अधिकाऱ्यांच्या मार्गदर्शनानुसार पुढील तपास करण्यात येणार आहे. दरम्यान, माजी मंत्री व अथणीचे आमदार लक्ष्मण सवदी यांचे चिरंजीव सुमित यांनी आपल्या गळ्यात वाघनखांचे पेंडंट घातल्याची छायाचित्रे सोशल मीडियावर व्हायरल झाल्यानंतर वन अधिकाऱ्यांनी अथणी येथील त्यांच्याही घरी भेट देऊन तपासणी केली आहे.