मुद्देबिहाळ येथे विहिरीत बुडून दोन भावांचा मृत्यू

बेंगळूर : कपडे धुण्यासाठी पडक्या विहिरीत उतरलेल्या दोन भावांचा बुडून मृत्यू झाला. विजापूर जिल्हय़ाच्या मुद्देबिहाळ येथील आश्रय कॉलनीमध्ये सोमवारी ही हृदयद्रावक घटना घडली आहे. प्रेमू हडपद (वय 14) आणि पुनित हडपद (वय 10) अशी विहिरीत बुडून मृत्यू झालेल्या बालकांची नावे आहेत. आपले कपडे धुण्यासाठी ते दोघे विहिरीत उतरले होते. दरम्यान, पाय घसरल्याने तोल जावून ते पाण्यात पडले. मात्र, पोहोता येत नसल्याने ते दोघे बुडाले. घटनेची माहिती मिळाल्यानंतर अग्नीशमन दलाचे अधिकारी प्रमोद बी. एस. यांच्या नेतृत्वाखाली अग्नीशमन दलाच्या जवानांनी बालकांचे मृतदेह बाहेर काढले. मुद्देबिहाळ पोलीस स्थानकात या घटनेची नोंद झाली आहे.