ऑनलाईन टीम / मुंबई :
श्रीराम जन्मभूमी तीर्थ क्षेत्र ट्रस्टकडून राम मंदिराच्या भूमिपूजन सोहळ्यासाठी महाराष्ट्राचे मुख्यमंत्री उद्धव ठाकरे यांनाही निमंत्रण देण्यात आले आहे. शिवाय उद्धव ठाकरेही भूमिपूजनाला जाणार असल्याचे शिवसेना खासदार संजय राऊत यांनी सांगितले आहे. परंतु धर्मनिरपेक्ष सरकारच्या प्रमुखांनी धार्मिक सोहळे टाळायला हवे, अशा आशयाचे ट्वीट राष्ट्रवादी काँग्रेसचे माजी खासदार माजीद मेमन यांनी उद्धव ठाकरेंना उद्देशून केले आहे.
येत्या 5 ऑगस्ट रोजी अयोध्येत राम मंदिराचे भूमिपूजन होणार असून पंतप्रधान नरेंद्र मोदी, गृहमंत्री अमित शहा यांच्यासह निवडक 300 जणांना निमंत्रण पाठवण्याची तयारी सुरु आहे. यामध्ये उद्धव ठाकरेंचेही नाव आहे.
या संदर्भात माजीद मेमन यांनी ट्वीट केलं आहे की, उद्धव ठाकरे हे राम मंदिराच्या भूमिपूजन सोहळ्याच्या कार्यक्रमातील निमंत्रित पाहुण्यांपैकी एक आहेत. कोविडच्या पार्श्वभूमीवर आवश्यक ती खबरदारी घेऊन उद्धव ठाकरे सहभागी होऊ शकतात. मात्र धर्मनिरपेक्ष सरकारच्या प्रमुखाने असे धार्मिक सोहळे टाळायला हवे.
