मुंबईतर्फे सर्वाधिक सामने खेळणारा खेळाडू कोण?

मुंबई इंडियन्सचा संघ म्हटले तर अनेक स्टार खेळाडू नजरेसमोर येतील. भारतीय क्रिकेट वर्तुळातील सचिनसह अव्वल खेळाडू या संघाचे स्टार ठरले आहेत. अर्थात, या संघातर्फे सर्वाधिक 150 सामने खेळणारा पहिला खेळाडू मात्र विदेशी आहे. तो म्हणजे वेस्ट इंडीजचा केरॉन पोलार्ड! बुधवारी मुंबई इंडियन्सने कोलकाता नाईट रायडर्सविरुद्ध लढत खेळली, त्यात पोलार्डने आयपीएल कारकिर्दीतील 150 सामन्यांचा टप्पा सर केला. त्याचा हाच माईलस्टोन साजरा करण्यासाठी मुंबई इंडियन्स प्रँचायझीने पोलार्डला या लढतीसाठी 150 क्रमांकाची जर्सी दिली. ‘आयपीएलमध्ये आमच्या संघातर्फे 150 सामने खेळणारा पहिला खेळाडू, केरॉन पोलार्ड’, असे ट्वीट मुंबई इंडियन्सने या लढतीदरम्यान केले. उंचापुरा केरॉन पोलार्ड 2010 च्या हंगामात मुंबई इंडियन्सच्या ताफ्यात दाखल झाला असून त्याते यादरम्यान 14 अर्धशतकांसह 2773 धावांची आतषबाजी केली. याशिवाय, त्याच्या खात्यात 56 बळी देखील आहेत.