ऑनलाईन टीम / मुंबई :
मुंबईच्या महापौर किशोरी पेडणेकर यांचा कोरोना रिपोर्ट पॉझिटिव्ह आला आहे. त्यांची बुधवारी अँटिजेन टेस्ट करण्यात आली होती. त्याचा रिपोर्ट आज पॉझिटिव्ह आला असून त्यांना कोरोनाची लागण झाली असल्याचे निष्पन्न झाले आहे. मात्र, लक्षणे नसल्याने घरीच क्वारंटाइन होवून डॉक्टरांच्या सल्याने उपचार घेत आहेत. स्वतः किशोरी पेडणेकर यांनी ट्विट करत या संदर्भात माहिती दिली आहे.
त्या आपल्या ट्विट मध्ये म्हणाल्या की, मी कोविड अँटीजन चाचणी करून घेतली ती सकारात्मक आली कोणतेही लक्षणं नसल्याने डॉक्टरांच्या सल्ल्याने स्वतः घरी विलगीकरन होत आहे माझ्या संपर्कातील सर्व सहकाऱ्यांनी काळजी घ्यावी. माझ्या घरातील सदस्यांची कोविड चाचणी केली. आपल्या शुभेच्छा व आशीर्वादाने लवकरच मुंबईकरांच्या सेवेत रुजू होईन, असेही त्यांनी यावेळी सांगितले आहे.
दरम्यान, किशोरी पेडणेकर या कोरोना पॉजिटिव्ह आल्यामुळे घरातील सर्वांचे तसेच बंगल्यावरील सर्व कर्मचाऱ्यांचे स्वॅब घेण्यात आले असून शुक्रवारी त्यांचे रिपोर्ट येतील. महापौरांची अँटिजेन टेस्ट पॉजिटिव्ह आली असली तरी खात्रीसाठी आरटीपीसीआर चाचणीकरता त्यांचा स्वॅबही घेतला गेला आहे.
