बरेच चित्रपट स्त्रियांना एका वेगळय़ा विचारापर्यंत पोहोचवण्यास मदत करतात. अशाच एका आगळय़ावेगळ्या पठडीतील महिला स्वातंत्र्याची जाणीव करून देणारा पुणे टॉकीज प्रस्तुत ‘निर्मल ः एनरुट’ हा चित्रपट लवकरच प्रेक्षकांच्या भेटीस येण्यास सज्ज झाला आहे.
अभिनयाची बाजू सांभाळत दिग्दर्शनाची धुरा सांभाळणारे अभिनेते ऋषी देशपांडे यांनी कायमच प्रेक्षकांच्या मनात आपली जागा निर्माण केली. त्यांच्या अभिनयाला आणि दिग्दर्शनाला प्रेक्षकांचा भरपूर प्रतिसाद मिळाला. थांग, समांतर, धूसर, वक्रतुंड महाकाय, धनक यासारखे चित्रपट असो किंवा सिटी ऑफ ड्रीम्स, लिटिल थिंग्स 3 सारख्या वेबसीरिज त्यांना प्रेक्षकांचा भरपूर प्रतिसाद मिळाला आहे. त्यांनी ‘जिंकी रे जिंकी’सारख्या विद्यार्थी आणि शिक्षक यांचे भावविश्व टिपणाऱया चित्रपटाचे दिग्दर्शन करून एका उत्तम दिग्दर्शनाची धुराही उत्तमरित्या पेलली. हेच प्रेक्षकांचे प्रेम मिळत रहावे म्हणून ते पुन्हा एकदा एका नव्या चित्रपटाच्या दिग्दर्शनातून सिनेरसिकांच्या भेटीस येण्यास सज्ज झाले आहेत. महिलांचे हित आणि स्वातंत्र्य याची गुंफण असलेला, आपल्या माऊलीपासून विभक्त असल्याची खंत मनाला सतावत असताना माऊलीच्या भेटीसाठी घडलेला प्रवास आणि संबंध जगलेल्या आयुष्यातील चढ-उतार याची मांडणी दिग्दर्शक ऋषी देशपांडेंनी या चित्रपटात केली आहे.
या चित्रपटाने कोलकता इंटरनॅशनल फिल्म फेस्टिव्हल, पॅनडा इंटरनॅशनल फिल्म फेस्टिव्हल, फेस्टिजिअस इंटरनॅशनल फिल्म फेस्टिव्हल लॉस अँजेलेस, दादासाहेब फाळके इंटरनॅशनल फिल्म फेस्टिव्हल दिल्ली, लॉस अँजेलेस इंडिपेंडंट फिल्म फेस्टिव्हल येथे आपल्या मानाचा तुरा रोवत चित्रपटाने बरेच पुरस्कार मिळवले आहेत. जगन्नाथ सुरपुरे, ग्लोबल सेवा आणि ऋषी देशपांडे, आद्योत फिल्मस निर्मित या चित्रपटाचे लेखन सुमित तांबे यांनी केले आहे. या चित्रपटाला संगीत निहार शेंबेकर याने दिले आहे. चित्रपटात झळकणाऱया कलाकारांची नावे अजूनही गुलदस्त्यात ठेवण्यात आली आहेत.
