ऑनलाईन टीम / मुंबई :
महाराष्ट्रात आतापर्यंत 8232 पोलिसांना कोरोनाची बाधा झाली आहे. तर आतापर्यंत 93 पोलिसांनी आपला जीव गमावला आहे.
कोरोनाच्या पार्श्वभूमीवर लागू करण्यात आलेल्या लॉकडाऊनचे नागरिकांकडून काटेकोरपणे पालन व्हावे, यासाठी राज्यभरात ठिकठिकाणी पोलीस तैनात आहेत. मात्र, कर्तव्यावर असलेल्या पोलीस अधिकारी आणि कर्मचाऱ्यांना कोरोनाचा धोका वाढत आहे. त्यामुळे पोलिसांमध्ये सध्या भीतीचे वातावरण निर्माण झाले आहे.
मिळालेल्या माहितीनुसार, आतापर्यंत आढळलेल्या 8232 पोलिसांमध्ये 861 पोलीस अधिकारी आणि 7371 कर्मचाऱ्यांचा समावेश आहे. तर मृत पावलेल्या 93 जणांमध्ये 7 अधिकारी आणि 86 पोलीस कर्मचारी यांचा समावेश आहे.
सद्यस्थितीत राज्यात 1 हजार 825 कोरोनाबाधित पोलीस कर्मचाऱ्यांवर विविध रुग्णालयात उपचार सुरु आहेत. यामध्ये 211 अधिकारी आणि 1611 कर्मचाऱ्यांचा समावेश आहे. तर आतापर्यंत 6 हजार 314 पोलीस कर्मचाऱ्यांनी कोरोनावर यशस्वीरित्या मात केली असून त्यांना घरी सोडण्यात आले आहे.
