ऑनलाईन टीम / मुंबई :
अंडरवर्ल्ड डॉन दाऊद इब्राहिमशी आर्थिक हितसंबंध आणि मनी लाँड्रिंगच्या आरोपाखाली न्यायालयीन कोठडीत असलेले अल्पसंख्याक मंत्री नवाब मलिक यांना आजही न्यायालयाकडून दिलासा मिळाला नाही. न्यायालयाने मलिकांच्या कोठडीत 4 एप्रिलपर्यंत वाढ केली आहे.
ईडीने 23 फेब्रुवारी रोजी नवाब मलिक यांना दाऊद इब्राहिमच्या कारवायांशी संबंधित मनी लाँड्रिंग प्रकरणात अटक केली होती. सुरुवातीला त्यांचा मुक्काम ईडीच्या कोठडीत होता. त्यानंतर मलिक यांना आर्थर रोड तुरुंगातील न्यायालयीन कोठडीत हलवण्यात आले होते. त्यानंतर झालेल्या सुनावणीत पुन्हा 21 मार्चपर्यंत कोठडी देण्यात आली होती. आज कोठडी संपत आल्यामुळे पुन्हा एकदा नवाब मलिक यांना न्यायालयात हजर करण्यात आले. त्यावेळी न्यायालयाने मलिकांना जामीन देण्यास नकार दिला. मलिक यांच्या कोठडीत 4 एप्रिलपर्यंत वाढ करण्यात आली आहे. मात्र, पाठीचा त्रास होत असल्यामुळे बेड, खुर्ची आणि चटई वापरण्यास मुभा देण्यात आली आहे.
