मंगळवारी राज्यात 15,223 जणांना लस

बेंगळूर : राज्यात कोरोनाचा प्रादुर्भाव कमी झालेला असतानाच कोरोना प्रतिबंधक कोव्हिशिल्ड आणि कोव्हॅक्सिन लसीकरण शनिवारपासून सुरू झाले आहे. मंगळवारी सायंकाळी 6 पर्यंत राज्यात 15,223 जणांना लस देण्यात आली. मंगळवारी दिवसभरात 32,305 जणांना लस देण्याचे उद्दिष्ट बाळगण्यात आले होते. परंतु, प्रत्यक्षात 47 टक्के जणांनीच लस घेतली आहे. चिक्कमंगळूर आणि तुमकूर जिल्हय़ांत लसीकरणाला उत्तम प्रतिसाद मिळत आहे. दरम्यान, राज्यात कोरोनाच्या रुग्णसंख्याही झपाटय़ाने कमी होत आहे. मागील चोवीस तासांमध्ये 645 नव्या कोरोनाबाधितांची नोंद झाली आहे. तर दिवसभरात 807 जण कोरोनामुक्त झाले असून त्यांना डिस्चार्ज देण्यात आला आहे. तर 6 बाधितांचा मृत्यू झाला. सध्या उपचारातील रुग्णसंख्या 7865 इतकी आहे. राज्यात आतापर्यंत एकूण 9,33,077 कोरोना रुग्णांची नोंद झाली आहे. तर 9,13,012 जणांनी कोरोनावर मात केली आहे. तर 12,181 रुग्णांचा कोरोनाने बळी गेला आहे.