महाआघाडीच्या सुवर्णा कोरे यांचा दहा विरुध्द नऊ मतांनी पराभव
प्रतिनिधी / मिरज
अत्यंत चुरशीने झालेल्या निवडणुकीत मिरज पंचायत समितीच्या सभापतीपदी भाजपाच्या सुमन शिवाजी भंडारे यांनी बाजी मारली. त्यांनी महाआघाडीच्या सुवर्णा बाळासाहेब कोरे यांचा 10 विरुध्द 9 मतांनी पराभव केला. काँग्रेसच्या पुनम कोळी यांनी भाजपाच्या बाजूने मतदान केल्याने महाआघाडीला मोठा धक्का बसला. या निवडीसाठी खासदार संजयकाका पाटील, आमदार सुरेशभाऊ खाडे, भाजपा शहर जिल्हाध्यक्ष दिपकबाबा शिंदे, प्रा. मोहन वनखंडे यांच्यासह अनेक पदाधिकाऱ्यांनी ठाण मांडले होते.
सभापती निवडीत दगाफटका होऊ नये म्हणून खासदार संजयकाका पाटील, आमदार सुरेशभाऊ खाडे यांनी काही दिवसांपासून चर्चेला प्राधान्य दिले होते. पण, शेवटपर्यंत बहुमत निश्चित होत नसल्याने आज निवडी दिवशी त्यांनी पंचायत समिती विश्रामगृहात ठिय्याच मारला होता. यावेळी त्यांनी अनेक सदस्यांची समजूत काढण्याचा प्रयत्न केला. पण, शुभांगी सावंत आणि सुनिता पाटील या शेवटपर्यंत महाआघाडी सोबतच राहिल्या. पण, काँग्रेसच्या पुनम कोळी यांनी महाआघाडीची साथ सोडून भाजपाच्या बाजूने आपले मतदान केले. त्यामुळे अटीतटीच्या या निवडीत भाजपाने शेवटच्या क्षणी दहा विरुध्द नऊ मतांनी बाजी मारली.
