प्रतिनिधी / लांजा
भक्ष्याचा पाठलाग करताना विहिरीत पडून बिबट्याचा मृत्यु झाल्याची घटना लांजा तालुक्यातील प्रभानवल्ली बेर्डेवाडी येथे बुधवारी दुपारी २.३० वाजण्याच्या दरम्यान उघडकीस आली.
येथील मनोहर भिकाजी साईल यांच्या घरा शेजारी असलेल्या विहिरीमध्ये मादी जातीचा बिबट्या मृत अवस्थेत आढळून आला. मिळालेल्या माहितीनुसार विहीर मालक मनोहर साइल हे दुपारी २.३० वाजण्याच्या दरम्यान आपल्या पाळीव जनावरांना पाणी काढण्यासाठी विहिरीचा पंप चालू करण्यासाठी गेले. मात्र विहिरीतून पंपाद्वारे पाणी का येत नाही म्हणून विहिरीत डोकाउन पाहिले असता त्यांना मृतावस्थेत बिबट्या विहिरीत पाण्यावर तरंगताना दिसून आला.
त्यांनी प्रभानवली गावचे सामाजिक कार्यकर्ते प्रकाश पांचाल यांना या घटनेची माहिती दिली. त्यानंतर लांजा वनविभागाला याबाबत माहिती देण्यात आली. वनविभागाला खबर मिळताच लांजा तालुक्याचे वनपाल सागर पताडे, वनरक्षक विक्रम कुंभार यांनी घटनास्थळी जाऊन मृत मादी जातीच्या बिबट्याला बाहेर काढले.
