वार्ताहर साखरपा
रत्नागिरी- कोल्हापूर महामार्गावर बेळगावहून रत्नागिरीकडे येणारी कर्नाटक आगाराची बस आंबा घाट उतरल्यानंतर उलटून अचानक पेटली. हा अपघात गुरुवारी सायंकाळी 5 वाजण्याच्या सुमारास साखरपा जाधववाडी येथे झाला. या अपघातात रत्नागिरीकडे येणारे एकूण 13 प्रवासी बालंबाल बचावले. या प्रवाशांना किरकोळ दुखापत झाली आहे.
जखमींना तातडीने नाणीजमधील दोन रुग्णवाहिकेतून साखरपा येथील प्राथमिक आरोग्य केंद्रात दाखल करण्यात आले. अपघाताची खबर मिळताच तातडीने स्थानिक ग्रामस्थ व साखरपा पोलीस घटनास्थळी पोहचले. त्यांनी सर्व प्रवाशांना सुखरूप बाहेर काढले व उपचारासाठी रूग्णालयात दाखल केले. दरम्यान, गाडीने पूर्ण पेट घेऊन हवेत धुराचा लोट पसरला. घटनास्थळी ग्रामस्थांनी गर्दी केली होती. अधिक तपास साखरपा पोलीस करत आहेत.
