मुंबई/प्रतिनिधी
महाराष्ट्राचे माजी गृहमंत्री अनिल देशमुख (anil deshmukh) यांच्यावर १०० कोटींच्या वसुलीचे आरोप करणारे मुंबईचे माजी पोलीस आयुक्त परमबीर सिंह (param bir singh) गेल्या कित्येक दिवसांपासून गायब आहेत. समन्स बजावूनही ते न्यायालयात देखील सुनावणीसाठी ते येत नसल्यामुळे आणि तपास यंत्रणांसमोर चौकशीसाठी हजर होत नसल्याने ते फरार असल्याचा संशय व्यक्त केला जातोय. यासंदर्भात राज्य सरकारने नेमलेल्या निवृत्त न्यायमूर्ती चंडीवाल (retired Justice Kailash U Chandiwal) आयोगासमोर सुनावणी सुरू असताना त्यांच्या वकिलांनी प्रतिज्ञापत्र दाखल केलं असून त्यासोबत जोडण्यात आलेल्या पॉवर ऑफ अॅटर्नीमुळे परमबीर सिंह यांचा ठावठिकाणा लागण्याची शक्यता निर्माण झाली असून परमबीर सिंह चंदीगढमध्ये (Chandigarh) असल्याचं बोललं जात आहे. यासंदर्भातलं इंडिया टुडेनं वृत्त दिलं आहे.
दरम्यान, परमबीर सिंह गेल्या कित्तेक दिवसांपासून बेपत्ता असून पोलीस त्यांचा शोध घेत आहे. तर प्रकृती अस्वास्थ्याचं कारण देत परमबीर सिंह सातत्याने सुनावणीसाठी गैरहजर राहात आहेत. सीबीआयकडून देखील सुरू असलेल्या तपासासाठी ते उपलब्ध होत नसल्यामुळे त्यांच्या ठावठिकाण्याविषयी वेगवेगळे तर्क लावले जात आहेत. काही दिवसापूर्वी ते देश सोडून गेल्याचा संशय व्यक्त करण्यात आला होता. मात्र, अशातच परमबीर सिंह यांनी त्यंचे वकील अभिनव चंद्रचूड यांच्यामार्फत प्रतिज्ञापत्र सादर केलं आहे. या प्रतिज्ञापत्रासोबत खुद्द परमबीर सिंह यांनी तयार केलेल्या पॉवर ऑफ अॅटर्नीमुळे त्यांचा ठावठिकाणा चंदीगढमध्ये असण्याची शक्यता निर्माण झाली आहे.
परमबीर सिंह यांनी ही पॉवर ऑफ अॅटर्नी चंदीगढमध्ये तयार केली आहे. कागदपत्रांवर पत्ता चंदीगढचाच असल्याने ते चंदीगढमध्येच असल्याची शक्यता आहे. महेश पांचाल या व्यक्तीच्या नावे परमबीर सिंह यांनी ही पॉवर ऑफ अॅटर्नी बनवली असून आपल्या ऐवजी महेश पांचाल न्यायालयीन आयोगासमोर सुनावणीसाठी उपस्थित राहतील, असं त्यांनी त्यात म्हटलं आहे.
