प्रतिनिधी/ सातारा
बेपत्ता झालेल्या ट्रक चालकाचा मृतदेह पाटण तालुक्यातील ऊरूल घाटाच्या दरीत आढळून आल्याने एकच खळबळ उडाली आहे. संतोष गोडसे असे बेपत्ता ट्रक चालकाचे नाव असून तो सातारा तालुक्यातील संगममाहुलीचा रहिवासा आहे. गेल्या चार ते पाच दिवसापासून तो बेपत्ता झाला होता.
याबाबत अधिक माहिती अशी की, सातारा जिह्यातील उंब्रज-पाटण मार्गावरील ऊरूल घाटातून संतोष नंदकुमार गोडसे (वय 44, रा. संगम माहुली, ता. सातारा) हे ट्रक चालक बेपत्ता झाल्याची फिर्याद मल्हारपेठ पोलीस ठाण्यात ट्रकचे मालक अनिल लोखंडे यांनी दिली होती.
दि. 26 रोजी संतोष गोडसे हे ऊरूल घाटातून पाटण येथून विटा भरलेला ट्रक घेऊन जात असताना पाटणकडून येणारे चारचाकी वाहन ट्रकला घासल्याने गोडसे यांनी ट्रक थांबवला. चारचाकी गाडीचालकाची याबाबत कोणतीही तक्रार नसल्याने ते निघून गेले. दरम्यान गोडसे यांनी ट्रकवरील कामगार मुजावर या त्यांच्या सहकार्याला लघवीला खाली उतरतो, असे सांगत मुजावर याच्याकडे पैशाचे पाकिट व मोबाईल देऊन उब्रंजच्या दिशेने गेले ते पुन्हा आलेच नसल्याचे फिर्यादीत सांगितले आहे. याबाबत मुजावर याने ट्रक मालक लोखंडे यांना फोन करून हकीकत सांगितली.
दि. 1 फेब्रुवारी रोजी पोलिसांना ऊरूल घाटात अज्ञात इसमाचा मृतदेह आढळून आल्याची माहिती मिळाली. याबाबत पोलीसांनी घटनास्थळी जाऊन पाहणी केली. यानंतर बेपत्ता असलेल्या गोडसे यांच्या नातेवाईकांना बोलावण्यात आले. नातेवाईकांनी संबंधित मृतदेह हा गोडसे यांचाच असल्याचे खात्रीने सांगितल्याने आता नेमकी ही हत्या की आत्महत्या याबाबत तपास सुरू करण्यात आहे.
नातेवाईकांनी सांगितल्यानुसार गोडसे यांची मानसिक स्थिती बरी नव्हती. घटनेचे गांभीर्य ओळखून सातारा स्थानिक गुन्हे शाखेचे पोलीस निरीक्षक किशोर धुमाळ यांच्या मार्गदर्शनाखाली सहायक पोलीस निरीक्षक रमेश गर्जे व टीमने प्रत्यक्ष घटनास्थळी जाऊन तपासचक्रे वेगाने फिरवली.
हत्या की आत्महत्या ?
गोडसे यांची मानसिक अवस्था बरी नसल्याने त्यांना गोळ्या सुरू असल्याचे पोलिसांना नातेवाईकांकडून सांगण्यात आले. त्यांच्या गोळ्या चुकल्यानंतर त्यांची प्रकृती अधिकच अत्यावस्थ होईल, अशी भिती नातेवाईकांना वाटत होती. अपघाताची घटना घडल्यानंतर भितीपोटी घटनास्थळावरून गोडसे निघून गेल्याचे नातेवाईकांचे म्हणणे होते. मृतदेह आढळून आल्याने नेमकी त्यांची हत्या की आत्महत्या हे पोलीस तपासात निष्पन्न होणार आहे.
