बेंगळूर/प्रतिनिधी
कर्नाटकचे मुख्यमंत्री बी. एस. येडियुरप्पा यांनी अखेर सोमवारी राजीनामा दिला आहे. येडियुरप्पांच्या राजीनाम्यानंतर नवा मुख्यमंत्री कोण याकडे सर्वांच्या नजरा लागून राहिलेल्या असताना मुख्यमंत्री पदासाठी अनेक नावं समोर येतायत. पण त्यात बी एल संतोष यांच्या नावाची सर्वाधिक चर्चा असल्याचं बोललं जात आहे. संतोष हे आरएसएसचे प्रचारक राहीलेले आहेत. टास्क मास्टर म्हणून ते ओळखले जातात. यूपी, असो की महाराष्ट्र, बी. एल. संतोष यांनी भाजपातले संघटनात्मक वाद सोडवले आहेत. स्पष्टवक्तेपणा यामुळे संतोष यांची वेगळी ओळख आहे. दरम्यान पक्षाध्यक्ष जेपी नड्डा हे ‘ऐकूण’ घेण्यात माहिर मानले जातात तर संतोष हे त्याच्या नेमके उलटे आहेत ते कडक शब्दात ते सुनावतात अशी त्यांची ओळख आहे. त्यांच्याच खांद्यावर आता भाजप कर्नाटकच्या मुख्यमंत्रीपदाची जबाबदारी देणार अशी जोरदार चर्चा आहे. याबाबत सूत्रांनी माहिती दिली आहे.
कोण आहेत बी.एल. संतोष?
आरएसएसचे प्रचारक म्हणून बी. एल. संतोष यांची खास ओळख आहे. संतोष यांनी इंजिनिअरींगमध्ये पदवी घेतली आहे. त्यांनी कर्नाटक भाजपचे सरचिटणीस म्हणून संतोष यांनी काम केलंय. दोन वर्षापासून ते भाजपचे राष्ट्रीय सरचिटणीस म्हणूनही कार्यरत आहेत. संतोष यांचं संघटन कौशल्य वादातील असल्याचं मानलं जातं. कर्नाटकच्या प्रत्येक विधानसभा क्षेत्रातले कार्यकर्ते संतोष यांना नावासह माहित असल्याचं अनेक जण सांगतात. पक्षात त्यांनी संतोषजी नावानेच बोललं जातं. येडियुरप्पा यांनी राजीनामा दिल्यानंतर लगेचच संतोष हे कर्नाटकात पोहोचलेले आहेत.
दरम्यान, येडियुरप्पांनी राजीनामा दिल्यानंतर काहींनी उघड उघड मुख्यमंत्रीपदावर दावा केलाय. त्यातच कर्नाटक हे राजकीयदृष्ट्या अस्थिर राज्य आहे. त्यामुळे बी.एल.संतोष आणि इतर भाजपा नेते हे स्वत: जेडीएस नेते एचडी रेवण्णा यांच्या संपर्कात आहेत. कारण जेडीएसचेच उपनेते बंदेप्पा काशेमपूर हे गेली चार दिवस दिल्लीत तळ ठोकून होते. येडियुरप्पांना याची कल्पना आहे, त्यामुळेच 2008 मध्ये जेडीएसनं ठरलेलं असतानाही भाजपला कशी सत्ता सोपवली नव्हती याची आठवण भाजपला करुन दिलीय.
