प्रतिनिधी / कोल्हापूर
जिल्हयामध्ये कोणत्याही व्यवसायात 14 वर्षाखालील बालकांना तसेच प्रतिबंधीत उद्योग व प्रक्रिया करणा-या संस्थामध्ये 15 ते 18 वर्षामधील किशोरवयीन कामगार कामावर ठेवू नयेत. असे कामगार ठेवणार्यांवर कारवाई केली जाईल, असा इशारा जिल्हाधिकारी राहुल रेखावार यांनी गुरुवारी येथे दिला. जिल्हाधिकारी कार्यालयात जिल्हा बाल व किशोरवयीन कामगार कृतीदलाची बैठक आयोजित करण्यात आली होती. यावेळी ते बोलत होते.
जिल्हाधिकारी रेखावार म्हणाले, शासन अधिसूचना दि. 30 जुलै 2016 अन्वये प्रतिबंधीत उद्योग व प्रक्रिया करणा-या संस्थामध्ये 14 वर्षाखालील बालक तसेच 15 ते 18 वर्षामधील किशोरवयीन कामगारांस कामावर ठेवण्यास कायद्याने मनाई करण्यात आली आहे. कोणत्याही प्रकारच्या आस्थापनेमध्ये बालकास कामावर ठेवल्यास 6 महिने ते 2 वर्षे इतकी शिक्षा व 20 ते 50 हजार रुपये इतका दंड होऊ शकतो. प्रतिबंधीत उद्योग व प्रक्रिया करणा-या संस्थांमध्ये किशोरवयीन कामगारास कामास ठेवल्यास 6 महिने ते 2 वर्षे इतकी शिक्षा व 20 ते 50 हजार रुपये दंडाची तरतुद आहे.
ज्या ठिकाणी बाल कामगार असल्याचे आढळून येईल अशा आस्थापनेचा परवाना / नोंदणी रद्द होईल. तसेच या आस्थापना ज्या इमारतीमध्ये सुरु आहेत त्या इमारतीचा बांधकाम परवाना रद्द होईल. गुन्हा दाखल झालेल्या व्यक्तीस किंवा संस्थेस कोणतेही शासकीय काम मिळणार नाही. तसेच संस्थेला किंवा उद्योगाला जागा, इमारत भाडेतत्वावर देण्या-या मालकांना सहआरोपी करण्यात येईल. यावेळी शासकीय कृतीदल सदस्य तसेच स्वयंसेवी संस्थांचे प्रतिनिधी उपस्थित होते.
