क्रीडा प्रतिनिधी/ मडगाव
सातव्या हिरो इंडियन सुपरलीग फुटबॉल स्पर्धेत आज सोमवारी एफसी गोवासमोर पहिल्या विजयासाठी नॉर्थईस्ट युनायटेड एफसीचे आव्हान असेल. फातोर्डा येथील नेहरु स्टेडियमवर हा सामना खेळविण्यात येईल.
नॉर्थईस्ट युनायटेडने एक विजय आणि एका बरोबरीसह पहिल्या दोन सामन्यांत अपराजित मालिका राखली आहे. त्यांचे दोन सामन्यांतून 4 तर एफसी गोवाचे दोन सामन्यांतून फक्त एक गुण झाला आहे. एफसी गोवाचे नवे प्रशिक्षक म्हणून सुत्रे स्वीकारल्यानंतर जुआन फॅरांडो यांनी प्रभाव पाडला आहे. त्यांच्या मार्गदर्शनाखाली एफसी गोवाचा खेळ चांगला होत आहे.
पहिल्या दोन्ही सामन्यांत गोव्याने आक्रमक खेळाचे धोरण कायम राखले, पण फुटबॉलमध्ये महत्वाचा असतो तो निकाल, ज्यात प्रभावी खेळानंतरही तीन गुण मिळविण्यात एफसी गोव्याला अपयश आहे
नॉर्थईस्ट युनायटेडविरूद्ध चित्र पालटण्यासाठी फॅरांडो आतूर असतील. दोन निकाल प्रतिकूल लागले तरी आक्रमक खेळावरच त्यांचा भर राहील. तीन गुण जिंकण्याचा आमचा दृष्टिकोन आहे. निकालांबाबत मी समाधानी नाही, कारण बेंगलोर एफसीविरूद्ध आम्हाला जिंकण्याची जास्त संधी होती. मुंबई सिटीविरूद्ध आमच्या खेळाडूंना पुरेशा संधी मिळाल्या नाही, असे फॅरांडो म्हणाले.
एफसी गोवासाठी नॉर्थईस्ट युनायटेड हा काही सोपा प्रतिस्पर्धी नसेल. त्यांचा खेळ आक्रमक असतो. त्यांचे विंगर्स ड्रिबलिंगचे उत्तम कौशल्य प्रदर्शित करतात, असे फॅरांडो म्हणाले. सामन्यावर नियंत्रण मिळविणे महत्वाचे असेल आणि या सामन्यासाठी आमच्याकडे योजना आहे आणि तशी असणे महत्वाचे आहे. त्याविषयी मी जास्त स्पष्टीकरण देऊ शकत नाही, ते तुम्ही सामन्यात बघू शकतात, असे फॅरांडो म्हणाले.
एफसी गोवाविरूद्ध गेल्या पाच सामन्यांत नॉर्थईस्टला एकही विजय मिळविता आलेला नाही. तीन पराभव आणि दोन बरोबरी अशी त्यांची कामगिरी झाली आहे. मुंबई सिटीला पराभवाचा धक्का दिल्यानंतर केरळ ब्लास्टर्सविरूद्ध नॉर्थईस्ट युनायटेडने एक गुण खेचून आणला. बचावफळीतील बेंजामिन लँबोट आणि डायलन फॉक्स यांचा खेळ मागील दोन सामन्यात उठावदार झाला आहे.
‘संघाचे मनोधैर्य उंचावलेले आहे. पहिल्या दोन सामन्यांमधील कामगिरीनंतर खेळाडू रोमांचित झाले आहेत. खेळाडू तसेच संघ म्हणून आम्ही बऱयाच बाबतीत सुधारणा करू शकतो. एफसी गोवाविरूद्धचा सामना सर्वांत महत्वाचा आहे. आमच्यासमोर मोठे आव्हान असेल. आम्हाला ते समजून खेळणे महत्वाचे आहे. गेल्या मोसमात एफसी गोवाने लीगमध्ये अव्वल स्थान मिळविले होते हे विसरून चालणार नाही‘ असे प्रशिक्षक जेरार्ड न्यूस म्हणाले.
फॅरोंडो यांच्याप्रमाणेच न्यूस यांना सुद्धा सामन्यावर नियंत्रण मिळविणे गरजेचे वाटते. सामन्यावर जो नियंत्रण मिळवितो, तो विजयाच्या जास्त संधी निर्माण करतो, असे न्यूस म्हणाले. जिंकण्यासाठी प्रतिस्पर्ध्यापेक्षा जास्त संधी निर्माण करणे आणि प्रतिस्पर्ध्याला जास्त निर्माण करू न देण्याकडे आमचे लक्ष्य असेल, असे न्यूस शेवटी म्हणाले.
