पुणे \ ऑनलाईन टीम
मराठा आरक्षणाच्या मुद्द्यावर आज खासदार संभाजीराजे छत्रपपती आणि खासदार उदयनराजे भोसले यांची पुण्यातील व्यावसायिक संदीप पटेल यांच्या घरी भेट झाली. संभाजीराजे आणि उदयनराजे भोसले यांच्यात जवळ जवळ २५ मिनिटं चर्चा झाली असल्याची माहिती समोर आली आहे. भेटीनंतर दोन्ही राजेंनी माध्यमांशी संवाद साधला.
यावेळी खासदार संभाजीराजे छत्रपपती माध्यमांशी संवाद साधताना म्हणाले की, दोन्ही छत्रपती घराण्यांचा फार मोठा सामाजिक वारसा आहे. समाजाला आम्ही नेहमी एक वेगळी दिशा दिली आहे. दिशाभालू करणं आमच्या रक्तात नाही. म्हणून आपण उदयनराजेंची भेटी घेतली. आमची सविस्तर चर्चा झाली असून बहुतांश अनेक विषयांवर आमचं एकमत आहे. आमच्यात अजिबात दुमत नाही. आम्ही पूर्वीपासून एकमतानं काम करत आलो आहोत.मी पाच मागण्या मांडल्या असून मंजूर केल्यास स्वागत करु शकतो. समाज बोलला आहे, लोक बोललेत आणि लोकप्रतिनिधींनी बोलणं गरजेचं आहे. अधिवेशनाच्या माध्यमातूनही हा प्रश्न मार्गी लागू शकतो, असंही यावेळी त्यांनी सांगितलं. बऱ्याच वर्षानंतर सातारा आणि कोल्हापूर घराणं एकत्र झाल्याचा आनंद यावेळी त्यांनी व्यक्त केला.
अजित पवार आणि छत्रपती शाहू महाराज भेटीवर बोलताना ते म्हणाले की, अजित पवार यांना आशीर्वाद घ्यायचा असेल. त्या भेटीत काय झालं याची माहिती नाही. ही भेट होणार आहे याची मला कल्पना नव्हती. काही सकारात्मक होत असेल तर स्वागतच असल्याचे देखील त्यांच्याकडून सांगण्यात आले.
तसेच उदयनराजे यांनी देखील यावेळी माध्यमांशी बोलताना संभाजीराजेंनी पुकारलेल्या मूक आंदोलनाला आपला पाठिंबा असल्याचं सांगितलं. त्यांनी काय करावं हा त्यांचा मुद्दा आहे, शेवटी मराठा आरक्षण हेच ध्येय आहे असं त्यांनी स्पष्ट केलं.
