तरुण भारत संवाद प्रतिनिधी / कुर्डुवाडी
पिंपळनेर ता. माढा येथील सोलापूर जिल्हा मध्यवर्ती बँकेचे अज्ञात चोरट्यांनी कुलूप तोडून ४२ हजारांचे संगणकीय साहित्य चोरून नेले असल्याची फिर्याद शाखाधिकारी नवनाथ जनार्दन दगडे यांनी कुर्डुवाडी पोलिसांत दिली आहे.
याबाबत अधिक माहिती अशी की, पिंपळनेर ता. माढा येथील जिल्हामध्यवर्ती बँकेचे सर्व कर्मचारी शनिवारी सायं. ५.३० वा. आपल्या बँकेचे कामकाज उरकून घरी गेले होते. दरम्यान रविवारी सकाळी निमगांव टे. शाखेच्या शिपायाने फिर्यादी पिंपळनेर बँकेच्या शाखाधिकारी यांना फोन करुन तुमच्या बँकेच्या ग्रीलचा व लाकडी दरवाजा उघडा आहे. ग्रीलचे कुलूप कापलेले दिसत आहे. फिर्यादी शाखाधिकारी दगडे यांनी येऊन पाहिले असता बँकेतील काऊंटरवरिल संगणक साहित्य चोरीला गेले असल्याचे लक्षात आले. यामध्ये ४ मॉनिटर एकूण किंमत १२ हजार रुपये, १२ हजार रुपये किंमतीचे ४ सीपीयु, ५ हजार रुपये किमतीचा प्रिंटर, ४ हजार युपीस इनव्हर्टर, ९ हजार रुपये किमतीच्या दोन बॅटऱ्या असा एकूण ४२ हजारांचा ऐवज चोरीला गेला आहे.
