सातारा : सातारा नगरपालिकेची निवडणूक डोळ्यासमोर ठेवून भाजप कार्यकर्त्यांनी कामाला सुरुवात केली आहे. सातारा शहरातील सर्व 131 बुथवर बूथ कमिटीचे काम चालू आहे. त्यामुळे नगरपालिका निवडणूक भाजप पूर्ण ताकदीने लढेल, असा विश्वास भारतीय जनता पार्टीचे जिल्हाध्यक्ष विक्रम पावसकर यांनी व्यक्त केला.
सातारा शहरातील आगामी निवडणुकीच्या अनुषंगाने सातारा शहरातील भारतीय जनता पार्टीने प्रत्येक वार्ड साठी एका प्रभारीची नियुक्ती केली आहे. या प्रभारींनी आपल्या वाॅर्डचा पूर्ण अभ्यास करून भारतीय जनता पार्टीच्या शहर कार्यकारिणीकडे अहवाल सादर करायचा आहे. वाॅर्ड प्रभारींची बैठक रविवारी सातारा शहरात पार पडली.
यावेळी विक्रम पावसकर म्हणाले, सातारा शहरात भारतीय जनता पार्टीचे सर्व प्रकारचे कार्यक्रम चांगल्या पद्धतीने राबवले जातात. साताऱ्यातील परिस्थिती खूप चांगली आहे. माननीय प्रदेशाध्यक्षांनी पण हे मान्य केले आहे आणि सर्वांनी मिळून काम केले तर आपल्याला अवघड काहीच नाही फक्त पक्षाशी एकनिष्ठ राहून काम करावे तिकीट मिळाले तर निवडून येण्यासाठी प्रयत्न करावेत तिकीट मिळाले नाही तर पक्षाने ज्यांना उमेदवारी दिली आहे त्यांच्या मागे ठामपणे उभे राहावे , लवकरच या निवडणुकीसाठी भारतीय जनता पार्टी च्या कोअर कमिटीची नेमणूक केली जाईल, साताऱ्यातील पदाधिकारी कार्यकर्त्यांच्या भावना प्रदेशाला कळविल्या जातीलच परंतु भारतीय जनता पार्टी, सातारा शहर नगरपालिका निवडणूक पूर्ण ताकदीनिशी लढेल यावर सर्व कार्यकर्ते पदाधिकाऱ्यांनी काम करावे.
यावेळी जिल्हा सरचिटणीस विठ्ठल बलशेटवार, जिल्हा उपाध्यक्ष ऍड प्रशांत खामकर, राहुल शिवनामे,कोषाध्यक्ष किशोर गोडबोले, नगरसेवक धनंजय जांभळे, विजय काटवटे आदी उपस्थित होते.
