जुना राजवाडा पोलीस ठाण्यात दोन्ही संघांच्या पदाधिकारी, खेळाडूंची बैठक
कोल्हापूर प्रतिनिधी
केएसए लीग फुटबॉल स्पर्धेत आज गुरूवारी पाटाकडील तालीम मंडळ आणि शिवाजी तरुण मंडळ यांच्यात अत्यंत महत्वाचा सामना छत्रपती शाहू स्टेडियमवर होणार आहे. या सामन्यातील निकालावर लीगचे विजेतेपद संपादन करणारा संघ ठरणार आहे. त्यामुळे हायव्होल्टेज सामन्यात कोणताही अनुचित प्रकार घडू नये, यासाठी बुधवारी जुना राजवाडा पोलीस ठाण्यात दोन्ही संघाचे पदाधिकारी, खेळाडू यांची बैठक घेण्यात आली.
बैठकीला जुना राजवाडय़ाचे पोलीस निरीक्षक दत्तात्रय नाळे, जिल्हा विशेष शाखेचे पोलीस निरीक्षक तानाजी सावंत यांच्यासह शिवाजी तरूण मंडळाचे अध्यक्ष सुजित चव्हाण, पदाधिकारी महेश जाधव तसेच पाटाकडील तालमीचे पदाधिकारी, खेळाडू उपस्थित होते. यावेळी पोलिसांकडून सामन्यावेळी दोन्ही संघांच्या समर्थकांनी जय, पराजय कोणाचाही होवो, सामना खिलाडूवृत्तीने पार पाडावा, व्हॉट्सअपसह सोशल मीडियावर कोणत्याही पोस्ट व्हायरल करू नयेत, यासाठी पदाधिकाऱयांनी, खेळाडूंनी आपल्या संघ समर्थकांना आवाहन करावे, अशा सूचना करण्यात आल्या. दोन्ही संघांच्या पदाधिकाऱयांनीही मते मांडली.
