पाकिस्तानात माजी विदेशमंत्री अटकेत

इस्लामाबाद : पाकिस्तानचे माजी विदेशमंत्री आणि नवाज शरीफ यांच्या पीएमएल-एन या पक्षाचे नेते ख्वाजा आसिफ यांना बेहिशेबी मालमत्ता बाळगल्याच्या आरोपाप्रकरणी मंगळवारी रात्री अटक करण्यात आली आहे. ही कारवाई राष्ट्रीय उत्तरदायित्त्व विभागाने (एनएबी) केली आहे. नवाज शरीफ यांच्या कन्या आणि प्रमुख विरोधी पक्षनेत्या मरियम यांनी आसिफ यांच्या अटकेला हुकुमशाही ठरविले आहे.  आसिफ यांना अटक नव्हे तर त्यांचे अपहरण करण्यात आल्याचे त्या म्हणाल्या. विरोधकांवर दबाव टाकण्यासाठी आणि आंदोलन संपुष्टात आणण्यासाठी इम्रान खान सरकार विविध प्रकारचे मार्ग अवलंबित आहे. आणखीन काही नेत्यांना अटक करण्यात येणार असल्याची चर्चा आहे.