ऑनलाईन टीम / इस्लामाबाद :
पाकिस्तानात कोरोनाबाधितांची संख्या 3 लाखांच्या उंबरठ्यावर येऊन ठेपली आहे. पाकमध्ये आतापर्यंत 2 लाख 99 हजार 233 जणांना कोरोनाची बाधा झाली आहे. त्यामधील 2 लाख 86 हजार 157 रुग्ण या आजारातून बरे झाले असून, त्यांना डिस्चार्ज देण्यात आला आहे. वर्ल्डोमीटर या संकेतस्थळाने ही आकडेवारी प्रसिद्ध केली आहे.
पाकिस्तानमध्ये सोमवारी 394 नवे कोरोना रुग्ण आढळून आले. तर 3 जणांचा मृत्यू झाला आहे. सध्या पाकिस्तानात 6 हजार 726 रुग्णांवर उपचार सुरू आहेत. त्यामधील 606 रुग्णांची प्रकृती चिंताजनक आहे. तर 6 हजार 350 जणांचा मृत्यू झाला आहे.
कोरोना रुग्णवाढीच्या संख्येत पाकिस्तानचा जगात सतरावा क्रमांक लागतो. पाकिस्तानात आतापर्यंत 28 लाख 02 हजार 210 कोरोना चाचण्या करण्यात आल्या आहेत. कोरोना रुग्णवाढीच्या संख्येत अमेरिका पहिल्या, भारत दुसऱ्या तर ब्राझील तिसऱ्या क्रमांकावर आहे. अमेरिकेत आतापर्यंत 64 लाख 85 हजार 838 कोरोनाबाधित रुग्ण आढळले आहेत. भारतात 42 लाख 84 हजार 103 तर ब्राझीलमध्ये ही संख्या 41 लाख 47 हजार 797 एवढी आहे.
