नवी दिल्ली / वृत्तसंस्था
सरकारने चालू शैक्षणिक वर्षात जुन्या पॅटर्नवर नीट-एसएस (सुपर स्पेशालिटी) परीक्षा घेण्यास सहमती दर्शवली आहे. बुधवारी सर्वोच्च न्यायालयाला यासंबंधी माहिती देण्यात आली. केंद्र सरकारने जुन्या पॅटर्नवरून परीक्षा घेण्यासाठी दोन महिन्यांचा वेळ मागितला आहे. या वषी नीट-एसएस परीक्षा जुन्या पॅटर्नवर घेतली जाईल. परंतु पुढील वर्षापासून (2022-23) नवीन परीक्षा पद्धती अवलंबिण्यात येणार असल्याचे स्पष्ट करण्यात आले. सरकारकडून ठोस माहिती प्राप्त झाल्यानंतर न्यायालयाने सर्व प्रलंबित सुनावणी बंद केल्या. 41 पदव्युत्तर डॉक्टरांनी दाखल केलेल्या याचिकेवर सर्वोच्च न्यायालय सुनावणी करत होते. तरुण डॉक्टरांच्या भविष्यासाठी हा मुद्दा महत्त्वाचा असल्याचे याचिकेत नमूद करण्यात आले होते. नीट-एसएस ही विविध डीएम/एसीएच आणि डीएनबी-एसएस अभ्यासक्रमांच्या प्रवेशासाठी घेण्यात येणारी पात्रता सहरँकिंग परीक्षा आहे.
यापूर्वी 27 ऑगस्ट रोजी सर्वोच्च न्यायालयाने केंद्र सरकारला नीट-एसएस (सुपर स्पेशालिटी) परीक्षेच्या पॅटर्नमध्ये शेवटच्या क्षणी बदल केल्याबद्दल फटकारले होते. केंद्र सरकारने सत्तेच्या खेळात तरुण डॉक्टरांना फुटबॉल बनवू नये, असा इशारा सर्वोच्च न्यायालयाने दिला होता. न्यायमूर्ती डी. वाय. चंद्रचूड आणि न्यायमूर्ती बी. व्ही. नागरथना यांच्या खंडपीठाने म्हटले होते की, जर न्यायालयाने परीक्षेच्या स्वरूपातील बदलाबाबत केलेल्या युक्तिवादावर समाधान न झाल्यास त्याविरोधात आदेश दिला जाऊ शकतो, असेही स्पष्ट केले होते.
