ऑनलाईन टीम / मुंबई :
आयपीएल संपेपर्यंत मराठीत समालोचनाचा पर्याय द्या, नाहीतर आंदोलन करु आणि या आंदोलनाची संपूर्ण जबाबदारी तुमची असेल, असा इशारा मनेसेने डिस्ने हॉटस्टार कंपनीला पत्राद्वारे दिला आहे.मनसे कामगार सेनेचे सरचिटणीस केतन नाईक यांनी याबाबत ट्विट करत ही माहिती दिली.
आयपीएल क्रिकेट सामान्यांचे समालोचन मराठीत करण्यास कुठल्याही प्रकारची अडचण आली तर आम्ही आवश्यक ते सहकार्य करु, पण नुसतीच चालढकल केलीत तर महाराष्ट्र सैनिकांशी गाठ आहे हे लक्षात असुद्या, असा इशारा देखील मनसेचे केतन नाईक यांनी दिला.
डिस्ने हॉटस्टार या ओ.टी.टी. व्यासपीठावर आयपीएलचे टी-20 सामने दाखविण्यात येत आहेत. हे सामने पाहणाऱ्या प्रेक्षकांना खेळाचे समालोचन त्यांच्या पसंतीच्या भाषेत ऐकण्यासाठी पर्याय उपलब्ध आहे. यामध्ये हिंदी, इंग्रजी, तामिळ, तेलगू, कनडा आणि बंगाली भाषा निवडण्याचा पर्याय आहे. पण महाराष्ट्राची अधिकृत राज्यभाषा मराठी भाषेचा पर्याय उपलब्ध नाही, असे मनेसेने पत्रात म्हटले आहे.
डिस्ने हॉटस्टारचं मुख्यालय महाराष्ट्राची राजधानी असलेल्या मुंबईत आहे. विशेष म्हणजे आयपीएलचे टी-20 सामने पाहणारा मराठी भाषिक प्रेक्षकवर्ग जास्त असताना आपल्याला मराठी भाषेचा विसर पडला. मराठी भाषेला दुय्यम दर्जा दिला गेला, असा आरोप पत्रात करण्यात आला आहे.
